Nindot na kono kaayo ang atubangan sa simbahan sa Sto. Rosario. Moderno na kaayo. Apan, sukad sa pagka-bag-o niini, wa pa gyud ko kakita sa kinatibuk-ang hitsura tungod kay wa pa ko makaadto sa atbang niini kilid sa koral sa Central Bank.
Mosimba sad ko sa Sto. Rosario, apan lagi, tungod kay sukad sa pagpa-nindot niini, wa pa ko makaadto sa atbang niini, maoy hinungdan nga wa pa gyud ko makatino sa hitsura sa atubangan niini.
Ug pila kaha ka Sugbuanon ang wala pa usab makaklaro sa ka-nindot niini, kaylagi, kinahanglan mang magpaatbang ka to appreciate its beauty.
Sa una, ilang gi-display ang mga hulagway sa karaan ug bag-o nga façade sa simbahan. Ambut naa pa ba na ron. Basta kay alang nako, mas nindot gyud kadtong karaan o orihinal nga hitsura.
Kining bag-o ron, nindot man. Moderno kaayo. Apan, di ni dangtan og tuig, puol na. Lahi sa karaan nga lasting ang kanindot. Gi-retain lang unta to. At least ang façade, ang atubangan, sama sa gihimo sa dakbayan sa Danao, diin, gipabilin gyud ang karaan nga structure ug design sa atubangan.
Sayang kaayo ang simbahan sa Sto. Rosario, nawala ang pagka-historical, at least, sa façade niini.
Anyway, ako lang ning hunahuna, Dro, wa kay labut ini. Ug atong gi-acknowledged ang katahom na karon sa simbahan sa Sto. Rosario, ang palibot niini, ang mga kilid, hangtud na sa silong sa simbahan, ang tanan gi-tile na.
Hinuon, duna koy laing reklamo: Inig gamit nako sa ilang CR, mabawo kog ikid, aron maka-ihi. Maayo lag way bata, kay duna may usa ka urinal alang sa mga bata. Ambut nganong gipatas-an man nila ang ilang mga ihianan? Sa Redemptorist, sa Waterfront, sa MacDo, sa KFC, sa city hall, sa Kapitolyo, ug ubang mga establishments, wa may discrimination ang ilang mga urinal. Makaabot man ta, Dro. Di ba? Unsa may pagtuo nila sa mga parishioner sa Sto. Rosario, mga 6-footer ang tanan?
Bitaw, akong usbon, on the whole, nindot na kaayo ang simbahan sa Sto. Rosario. Kun ako pay Cardinal ron, i-promote dayon nako ang parish priest dinhi. Kay duna ra bay mga kura paroko nga wa kaayoy tagad sa ilang simbahan.