Ngayon ay panahong masarap matulog
Sapagka’t maulan sa gabi’y mahamog
Ganitong panaho’y biyaya ang dulot
Sa katawang hirap sa maghapong kayod!
Kaiba sa ibang natutulog ngayon
Sa pananaginip ako ay nabaon;
Halos gabi-gabi may mga okasyon
Na nakikita kong ngayon at kahapon!
Minsa’y nakita ko sa aking pangarap
Isang kapatid kong namatay sa hirap;
Siya’y nakangiti at tawag ng tawag
Nang maglapit kami ako ay niyakap!
Sumunod sa aking panaginip naman
Mabait kong hipag na namamaalam;
Patay na rin siya’t ako’y nilapitan
Lamig ng kamay n’ya’y aking naramdaman!
Isang gabi namang ako’y nanonood
Ng program sa TV ako’y nakatulog;
Sa upuang silya ako ay nahulog
Pagka’t sa pangarap ako ay natisod!
Dalawang patay na ang aking nakita
Sa panaginip ko na hindi masaya;
Ang sumunod dito’y nakapagtataka
Ito’y technicolor at napakaganda!
Sa aking pangarap ay kitang-kita ko
May dalawang anghel binubuhat ako;
Nang hindi mabuhat -– ako’y pinaupo
Sa pinto ng langit doon kay San Pedro!
Utos ni San Pedro ay buhatin ko na
Donasyon kong threadmill sa mga matanda;
Sapagka’t mabigat hindi ko rin kaya
Kaya si San Pedro ay tawa nang tawa!
Donasyon kong threadmill sa senior citizens
Nang magising ako’y marumi’t marusing
Walang gumagamit walang pumapansin
Kaya ipinasyang donasyo’y linisin!