Kun pangulo gani ta og usa ka kahugpongan, dili maayo nga manlupig kita sa atong mga sakop. Mas nindot pa gani nga sila maoy atong ipalabi aron pagpakita nga kita ehemplo kanila.
Kini maoy akong mensahe sa akong higala nga si Hayde “Basan” Amora, ang pangulo sa kahugpongan sa mga tigbaligya og imahen sa mga santos luyo nga bahin sa Basilica del Santo Niño.
Taud-taud g’yod nga gipalabay lang nako ang daghang mga adlaw nga dunay manawag kanako direkta sa akong cellular phone, dunay mag-text nga mireklamo sa iyang gihimo.
Gawas sa text messages ug mga tawag sa akong mobile phone, duna pa g’yoy miyuhot g’yod pagpakighinabi nako matag higayon nga moagi ko sa dapit sa ilang tindahan.
Apan bisan pa niini, ako lang gibaliwala. Nakaingon ko nga tingali naingon lang niini ang akong higala tungod sa kalisud sa kahimtang karon sa panginabuhi.
Mora’g sayop ko, kay ang mga nangreklamo mao diay ang mga giabusohan ug mas nangita pa og panginabuhian kay kang Basan nga dunay ubang matang sa panginabuhian.
Mga duha g’yod ka semana nga walay hunong ang tawag ug text messages nga akong nadawat, parehong nagpakilooy nga tabangan nako sila, apan wala lang gihapon nako tagda.
Nakaingon ko nga nganong ari man sila nako magpatabang nga usa ra man ko ka sakop sa media, dili man ko opisyal sa City Hall.
Apan ang akong pagpakahilom, ingon sa natandog dihang kaniadtong Biyernes, miabot sa among opisina ang igsuong babaye mismo ni Basan, si Merlinda Amora-Batiller nga daw kahilakon.
Mitug-an kini kanako nga gisumbag kuno siya ni Basan nga iya rang maguwang kay nasuko. Ang gikasuk-an mao nga gikatahapan siya nga maoy usa sa mga tigtawganan kanako ug mireklamo.
Gisaysay ni Inday Batiller kun giunsa siya pagpasakit ni Basan, ug gipakita kanako ang kopya sa medical certificate nga giisyu sa doktor.
Nabun-og ang iyang tuhod kay human kuno siya maigo sa kinumo diha sa iyang tangkugo, maayo niya nga pagkaluhod ug daw kakuyapon sa kasakit.
Buyno, kining maong kaso gipadangat na man sa Lupong Tagapamayapa mao nga huwaton nato ang sangpotanan.
Ang ako lang mao ang giingong pagpahimulos sa higayon ni Basan nga imbes siya ang pagpahiluna sa iyang mga sakop, siya hinuon ang nag-una-una pagpadaku og puwesto nga katindahan diha sa aseras ug anaa pa g’yod daplin sa pultahan sa simbahan.
Uy, mora’g pagpahimulos na kini sa higayon Bay. Mao diay nga ang ubang puwesto diha walay mibutang sa ilang tinda kay sila gihatagan lang og tag “two feet” nga gilapdon, samtang si Basan mora’g kapin sa dupa.
Akong balikon nga kun tinuod man kining reklamo sa mga tindera og imahen, apil na sa igsuong babaye ni Basan, daku na kining pagpanikas.
Angay nga ang mga opisyal sa City Hall mohatag dayon og diha-diha nga pagtagad niining maong isyu. Kun ako’y pagbut-on, mas maayo pang dili na lang g’yod mo patindahon diha kun mao man gani kini ang pagdumala nimo sa imong mga sakop.
Duna ka pa goy tindahan, tulo pa g’yod ka units, didto sa concrete stalls Bay Basan, unya mag-ilog-ilog ka pa g’yod diha sa dapit sa eskena? Naunsa ka god tawon.
Tambag nako ninyong mga tindera pag-eleksyon mo’g usab uy unya pagpili mo’g maayo ninyo nga lider sa grupo nga maantigo nga manalipod sa inyong katungod.