Daghan ang nagduda nga si magpapatigayon Efrain Pelaez nagplano g’yod paglansar pagka kongresista diha sa ika-unom nga distrito o kaha sa bugtong distrito sa Lapulapu kun mahinayon kining maong tinguha pagbuwag sa Lapulapu gikan sa 6th district.
Ang mga higala nako diha sa Lapulapu City mipasidaan sa kadagkoan sa Visayas Ombudsman nga magbantay kay basin og ang ilang ahensya magamit lang ni Mr. Pelaez aron pagpalambo sa iyang political image.
Sa ako nang giingon, nindot ang kampanya ni Mr. Pelaez batok sa graft and corruption sa mga opisyal ug kawani sa kagamhanan apan nahibulong ko kay ang giingong pagsuborno niya sa kanhi mayor sa Lapulapu nga si Ernest Weigel Jr. wala man niya tubaga.
Igo lang si Mr. Pelaez nga miingon nga karaan ug gibalik-balik na ang maong isyu ug nga ang pamilya sa kanhi mayor nagpagamit ni Mayor Arturo Radaza aron kuno pagdaut sa iyang dungog.
Dili ingon niana ang pagdepensa sa isyu Sir. Direktaha god pagtubag kun tinuod ba ang pasangil nga misuborno ka ni kanhi Mayor Weigel kaniadto sa tumong nga dili ka pit-on pagpabayad sa buhis sa imong mga patigayon.
Kun imong lihayan pagtubag ang maong isyu, magtoo g’yod hinuon ang katawhan nga tinuod ang maong pasangil.
Ang pasangil mao nga gihatagan nimo si kanhi Mayor Weigel og 1,500 ka shares sa Coral Point nga kantidad og P1.5 milyones ug nga aron dili mabulgar, gibutang ra gihapon nimo sa ngalan sa imong korporasyon.
Mao kini ang gitataw sa byuda ni kanhi Mayor Weigel ug sa iyang anak nga si Mark nga mipirma og affidavit.
Ang maong shares of stocks matud pa gibayran lang nimo og P500,000 human mamatay ang kanhi mayor.
Kun dili god nimo kini tubagon Mr. Pelaez, makayamiid man ang katawhan. Makaingon sila nga nagpa-accredit ka isip anti-graft watch volunteer sa Ombudsman, apan nanuborno ka diay.
Angay usab nimo nga itataw daan Mr. Pelaez kun may plano ka ba paglansar sa pagka kongresista sa eleksyon karong 2010.
Kun moingon ka nga wala kay plano nga mosulod sa politika, siguroa nga dili ka sama ni kanhi PNP chief ug karon Senador Panfilo Lacson.
Si Lacson kaniadto mibalik-balik pag-ingon nga “loud kaayo” ang politika alang kaniya. Apan naunsa ba nga milansar man hinuon pagka senador.
Karong gipasakaan na og kaso nga Bribery si Mr. Pelaez, mas labing maayo nga tubagon g’yod niya kining maong isyu, inay nga iyang lihayan ug moingon ra nga balik-balik ang maong pasangil.
* * *
Nasuta na g’yod nako nga tinuod ang report nga daghan kaayong mga internet cafés sa mga dapit nga duol ra sa mga tunghaang publiko dinhi sa dakbayan.
Nakita g’yod nako nga daghan kaayong mga batan-on nga nagduwa og lainlaing matang sa “games” sa mga internet cafés sa barangay Apas niadtong Biyernes sa hapon.
Usa kini sa mga dapit dinhi sa dakbayan nga gikareport ug gireklamo sa mga ginikanan kay “nabuang” na pag-ayo ang ilang mga anak sa “games” diha sa computer.
Angay’ng sutaon sa kadagkoan sa dakbayan kun wala ba makalapas sa balaud kining mga tagdumala sa maong mga internet cafés kay duol ra kaayo sa tunghaan ang ilang balay-patigayon.
Sa usa ka internet café, wala ko makasulod kay pwerteng punoa – walay bakante – ug ang tanang mga nagduwa mga batan-on nga nanagluklok pa’g notebook sa bulsa luyong bahin sa ilang karsones.