Daghan gyud og paagi ang mga badlongon sa katilingban aron sila makabiktima sa ilang isigkatawo. Usa sa labing epektibo nilang estilo sa modus operandi mao ang pagpamaryente.
Usa ka magbabasa ning column mi-text nga nagkanayon: “Pagbantay mo anang babaye nga mokalit lang og timbaya ninyo unya mamaryente kunohay. Mangingilad nang bayhana. Mohangyo dayon og kuwarta o pagkaon kay gigutom kuno siya kay nagbantay kuno siya’g pasyente. Gikan pa kuno siya sa bukid. Bisan unsaon nakog hunahuna wa gyud ko kaila niya. Kaduha na ko kasugat anang bayhana diha sa Tabo sa Banay. Moamen pa gyud. Grabe.” -- 0929-2774071 (Sent:12:56:22am-- May 4, 2008)
Daghang salamat sa kasayoran nga imong gipadangat diri kanato, higalang texter. Hinaot unta nga pinaagi niini, makabantay ang atong kaigsuonan aron dili sila mailad nianang giingon mong babaye nga modayon og pamaryente aron pagkahir sa iyang prospective victim.
* * *
“Good day, Sir. I have something to share. Ang among lugar ba sa Ughai II, San Roque, Talisay City daghan kaayog tubig kun mag-ulan. Moabot na god sa among tuhod ang tubig. Until now ang among kapitan wala pa gyud molihok. Siyaro na man sab kun wala sila makakita sa kadako sa tubig nga nilunop.” -- 0926-2883558 (Sent: 03:36:43pm-- May 3, 2008)
Angay tingaling palamboon ang drainage system diha sa inyong dapit. Maayo unta nga mahatagan na kinig pagtagad sa mga nahingtungdan.
Mas maayo sab nga kamong mga residente nga naapektohan sa maong problema mopadangat og hiniusang reklamo o hangyo ngadto sa inyong mga brgy. opisyal. Aron pormal ang inyong reklamo, sulata kini ug pirmahi ninyong tanan nga mga apektado sa suliran sa tubig-baha.
* * *
May mipadangat na sab og reklamo mahitungod sa mga traysikad diha sa Subangdaku, Mandaue city. Sumala sa text sa cell. no. 0921-9951793, mga bata nga nag-edad og 7 ngadto sa 9 ang nag-drive niini.
Nganong gipasagdan man kanang mga bataa? Nganong gitugotan man sila sa ilang mga ginikanan nga maka-drive sa traysikad? Kakuyaw!
(Sumbong ug reklamo? Text sa 0910-8105522)