Nahimong kabahin sa tawhanong pagbati ang kahadlok. Natural lamang kini alang sa usa ka tawo nga sama kanato ug kada usa kanato ang dili gyud makapangandak nga wala siya’y gikahadlokan labina kun ang gihisgotan mao ang mga butang nga malisud tugkaron sa atong tawhanong pagsabot.
Apan ang kahadlok mahimong tan-awon nato sa duha ka matang panlantaw. Positibo ug Negatibo. Ang positibong kahadlok mao ang matang sa kahadlok nga mas palabihon pa natong isulti ang matuod tungod ug alang sa atong prinsipyo ug paghigugma kang Kristo kaysa opinion ni bisan kinsa. Ang negatibong kahadlok mao ang maghimo kanatong mopili na lang sa sayop tungod sa posibling kabangis nga ato unyang mahiagoman gikan sa mga tawo nga mopugos kanato sa pagsulti na lang sa bakak aron pagpagawas sa matuod.
Tinuod lisud na kaayo ang panahon karon ug kinahanglan na nga maglisto gayud ang tawo. Apan wala kini magpasabot nga ato na lang ihiklin ang atong mga prinsipyo sa kinabuhi. Dili kalipay ang ihatag ngadto kang bisan kinsa nga nagpuyo sa bakak. Mao nga ang si bisan kinsa nga magpuyo sa bakak mga tawo sa kangitngit. Ang bugtong timailhan nga gihigugma nato ang Dios mao gyud ang maisog sa pagsulti ug pagpuyo sa KAMATUORAN.