Karong adlawa atong gisaulog ang atong kagawasan gikan sa mga imperyalistang nasud nga migaid kanato sulod sa gatusan ka mga katuigan. Apan wa gihapon kita makalingkawas sa gapos sa kakabus ug kawad-on. Padayon gihapon ang atong pag-antos sa kalisod.
Kini ang dakong hagit sa atong mga pangulo sa nasud, ang pagpalingkawas kanato gikan sa gapos sa kalisod. Apan may plano kaha sila nga haw-ason ta gikan niini? Wa kaha ta nila sabotahi-a? Plano gyod kaha sa atong mga pangulo ang pagwagtang sa kalisod o maoy plano niini ang pagpadaghan sa mga kabus aron daghan sila og mapahimudsan ilabi na panahon sa bugnong lugaynon.
* * *
Ang pagbukas sa klase gisugat gihapon sa samang suliran sama sa kakuwang sa classrooms, lingkoranan, mga magtutudlo ug uban pa. Kining maong suliran dugay ra untang nasulbad kun nagmatinud-anon pa ang atong gobiyerno sa iyang trabaho paghatag og dekalidad nga edukasyon ngadto sa iyang katawhan.
Nasulbad na unta kining maong suliran kun gitarong pa sa departamento sa edukasyon ang ilang trabaho sa pagtan-aw sa mga school building nga ilang gipahimo apan wa kapahimudsi tungod kay gikurakot ang pundo. Nasulbad na unta kining maong suliran kun plano pa sa gobiyerno ang pagsulbad niini.
* * *
Murag abot sa dunggan ang ngisi ni collector Belmonte ug mga opisyal sa Bureau of Customs sa Port of Cebu dihang wa mapamatud-i sa gipahigayong Congressional Investigation ang mga pasangil sa Cebu Auto Dealers Association kon CADA nga grabe kaayo ang car smuggling dinhi sa Sugbu. Unsa kahay mahitabo ni Usec. Antonio Villar Jr. sa Presidential Anti-Smuggling Group, wa kaha siya magmukhang kingkoy?