Ipatuman gayod sa Commission on Higher Education kon CHED ning tuiga ang Circular Memorandum Order number 5 nga nagdugang og 28 ka units kon katumbas sa tulo ka summer nga klase ug 500 kapin ka oras nga internship sa kursong nursing. Kini gumikan sa rason nga daghang migraduwar ning maong kurso ang dili makamao moininglis ug dili pa hanas sa ilang nakat-onan.
Dakong lansis ug pagtabon lamang sa kapalpakan sa CHED kining sulbad nga ilang nahuna-hunaan sa suliran nga ilang nakita sa kursong nursing. Tungod kay nahinanok sa ilang trabaho pagtan-aw sa kalidad sa instruction nga gipatuman sa mga tunghaan ug sa mga kahimanan niining gipanggamit kun haom o takdo ba kini sa gitanyag nga kurso, ang mga migraduwar na hinoon ang gibasol ug ang mga nagtungha pa sa kursong nursing ang ilang gisilutan. Ina kay motabang nga mogaan ang bug-at nga yugo nga gisab-ay sa liog sa mga ginikanan tungod sa dakong gasto sa pagpaedukar sa ilang mga anak, gipabug-atan pa gyod hinoon pagsamot sa CHED ang nagsukarap nang mga ginikanan.
Ang pagdugang og 28 ka units nga subjects sa mga tinun-an sa kursong nursing ug pagdugang og 500 kapin ka oras sa internship niini dili makahatag kanato og kaseguroan nga mora na unyag Amerikano nga moininglis ang mga graduwado ning maong kurso ug mahanas na usab sila sa ilang trabaho. Ang kalidad sa instruction ug mga kahimanan nga gipagamit sa mga tinun-an mao ang tubag sa suliran. Bisan usa pa ka gatos ang idugang nga subject, daghan gihapong graduwado ang dili makamao moininglis kana kun sila pagraduwaron bisan wala pa makakat-on. Daghan gihapong graduwado nga dili hanas sa ilang trabaho kana kun magpabilin gihapon ang practice sa ubang tunghaan nga “for your eyes only” ngadto sa ilang mga tinun-an ang mga kahimanan nga alang unta sa pagkat-on.
Sa pagkatinuod dili lamang mga graduwado sa kursong nursing ang dili makamao moininglis ug dili pa hanas sa kursong ilang nahuman. Daghan usab nga graduwado sa laing mga kurso ang di pod makamao moininglis ug di pa pod hanas sa ilang nakat-onan mao nga dili makiangayon ug makatarunganon nga ihan-ok sa CHED ang tanang pagsaway ngadto sa mga migraduwar sa kursong nursing.
Ang suliran nga nakita sa Commission on Higher Education kon CHED mugna ra sa ilang buhatan nga nahinanok ug wa magpakabana sa ilang trabaho pagmonitor sa kalidad sa instructions sa mga Higher Educational Institutions ug kamatuoran niini, ang mga graduwado ra sa kursong nursing ( dili tanan ) ang ilang nakit-an nga di makamao moininglis ug dili hanas sa ilang nakat-onan bisan kun mao gihapong suliran ang nasinati sa ubang kurso. Busa ang pagsulbad ning maong suliran dili angayan nga ipasa ngadto sa mga tinun-an ug mga ginikanan.