Ang deregulation law gipalabang panahon ni Presidente Fidel Valdez Ramos agi og tubag sa way puas nga pagsaka sa prisyo sa mga produktong petrolyo kaniadto. Usa sa mga nanguna sa pagpalabang niini mao si Senador Gloria Macapagal Arroyo nga presidente na karon.
Hugot nga gibarugan sa mga nagpalabang niining maong balaud nga ang pagderegulate sa industriya sa lana makapadasig ug makapasulod og bag-ong players sa negosyo sa lana nga maoy mokompetensiya sa gimonopoliya nga industriya sa giingong Big three nga mao ang Shell, Caltex ug Petron. Pero sa pagkatinood ang deregulation law maoy yokbo sa gobiyernong Ramos ngadto sa mga negosyante og lana nga kanunay nga nagreklamo nga gipamolitika ang industriya sa lana. Sa wa pa i-deregulate ang industriya sa lana, matag higayon nga mopaumento ang big three sa ilang produktong petrolyo mangayo una kini sila og pagtugot sa Energy Regulatory Commission kon ERC.
Ang ERC mangonsulta pa usab kini sa katawhan pinaagi sa ipatawag nga public hearing sa dili pa kini mohatag og pagtugot sa pagpaumento sa prisyo sa produktong petrolyo. Ang mga kompanya sa lana maoy magluhod-luhod kaniadto sa ERC aron hatagan sila og pagtugot sa pagpaumento sa prisyo sa lana. Apan karon nga gideregulate na ang industriya sa lana, gipikatan na lang sa mata ang atong gobiyerno sa mga magpapatigayon og lana. Ang gobiyerno na usab ang nagpakilooy kay ang deregulation law nagtugot man sa mga magpapatigayon og lana sa pagpaumento sa ilang prisyo nga wa nay pupananghid sa Energy Regulation Commission.
Mao na nga kun nakamatikod mo, kada semana ang pagsaka sa prisyo sa lana. Unya hatagan lang ta nila og rason nga taphaw. Matud pa nila misaka kuno ang prisyo sa lana sa kalibutanong merkado. Di man ta moreklamo ba kun paumentohan sa mga magpapatigayon og lana ang ilang prisyo tungod kay mitaas ang prisyo sa lana sa kalibutanong merkado kana kun wa sila moabuso. Pero sa atong nakita abuso na upod kining ilang gihimo.
Sayonan mo, ibutang ta, kagahapon pa miumento ang prisyo sa lana sa kalibutanong merkado pagkasunod adlaw mopaumento dayon sa ilang prisyo ang mga magpapatigayon og lana dinhi sa Pilipinas? Kay ngano nakapalit na diay dayon sila og lana basi sa maong prisyo? Nahurot na diay ang ilang pundo nga napalit sa ubos pa nga prisyo? Ang deregulation law kinahanglan lang gayod nga wagtangon kay giabusohan kini sa mga magpapatigayon og lana, wa kini makasulbad sa problema sa pagsige og saka sa prisyo sa lana.