Gisugyot ni kalihim Jesli Lapuz sa departamento sa edukasyon ang pagpadali sa pagpalabang sa balaudnon nga nag ung-ong karon sa ubos balay balauranan nga magpapriso sa mga ginikanan nga mapakyas sa pagpatungha sa ilang mga anak.
Gusto sa kalihim nga masilotan ug mapriso kadtong mga ginikanan nga dili mopatungha sa ilang mga anak kay gipatabang sa pagpangita og salapi para ikapalit og pagkaon sa pamilya nga diin mao kini ang hinungdan kun nganong daghan gihapong mga bata ang wa makatikang sa ang-ang sa elementarya ug kun nakatikang man wa kini makahuman.
Di kaha magkaproblem ang atong kagamhanan kun asa ibutang ang mga ginikanan nga maghuot unya sa atong mga prisohan lukop nasud tungod sa kapakyas sa pagpatungha sa ilang mga anak?
Ang sugyot ni kalihim Lapuz ug ang nag ung-ong nga balaudnon nagkinahanglan og halawom nga pag-usisa tungod kay komplikado ang suliran nga gusto niyang hatagan og kasulbaran.
Sa atong batakang balaud giingon nga libre ang primarya ug sekondarya nga edukasyon. Kay libre, gihimo niining compulsory ang edukasyon sa primarya. Apan nganong daghan man gihapong mga bata ang wa makatikang ug wa makahuman sa primarya o elementarya? Kini ang angayan nga tutokan ni kalihim Jesli Lapuz sa departamento sa edukasyon.
Ang pagdili sa pagpangolekta sa mga amotan atol sa pag-enroll sa elementarya ug sekondarya dili maoy tubag sa paghunong ug wala pagtungha sa mga bata. Kini tungod kay gawas nga lisod-lisoron sa mga magtutudlo ang mga ginikanan sa mga bata sa sunod nga enrollment mahal pa gayod kaayo ang mga kagamitan sa pagtungha. Wa pa ni labot sa ingalngal sa mga principal ug mga magtutudlo nga mga proyekto ug mga amotan. Mao ni ang nakababag sa mga ginikanang kabus sa pagpatungha sa ilang mga anak bisan pa man sa ilang tingoha nga mapahuman kini sa elementarya.
Ang Asian Development Bank miingon nga dos milyones kapin ka mga pinoy karon ang nagpuyo ubos sa kita nga usa ka dolyar matag adlaw. Ang mga ginikanan nga apil niining mokita lang og usa ka dolyar matag adlaw makapatungha pa kaha sa ilang mga anak? Pila ba ang balor sa usa ka dolyar karon? Dili ba 41 o 42 pesos lang? Sa 41 o 42 pesos makakaon kaha ka niini makatulo sa usa ka adlaw? Anaa pa kaha ka ani ikapatungha sa imong mga anak?
Kun ipapriso ni kalihim Jesli Lapuz ang mga ginikanan nga wa makapatungha sa ilang mga anak sa primarya ug sekondarya di kaha siya maglisod pagpangita og kaprisohan sa mga ginikanan nga apil ning dos milyones kapin ka mga kabus? Kun ipapriso man kining maong mga ginikanan tungod sa kapakyas sa pagpatungha sa ilang mga anak tabla pay ato silang gipakasa sa ilang ka kabus.