Gikan sa cellphone number 0928-3457357: “Sir, good AM. Sa merkado sa Tabunok daghang namaligyag bugas nga mangilad sa mga pumapalit. Ang ivory rice ug ganador rice ilang sagolan og bati ug baratohon nga bugas. Dali mapan-os. Mahal ra ba ang presyo. Maayo unta kun naay taga DTI nga magsusi niini o kaha tinugyanan gikan sa NFA nga maghikutar niini. Pangilad na ni.” -- (Sent: 11:01:30am--February 12, 2008)
Mao niy usa sa mga binuang nga gihimo sa mga negosyanteg bugas, dili lang diha sa Tabunok kondili sa uban sab nga mga dapit. Klarong pangilad kini ngadto sa mga pumapalit. Dili makiangayon ang maong buhat busa angay kining pitolon sa proper authorities. Hinaot unta nga mahatagan kini nila’g dakong pagtagad!
* * *
Usa nato ka impormante nga kanunay naniid sa kalihokan sa mga fixer diha sa Mandaue LTO mihunghong nato nga wala gyu’y pagkibra ang paspas nga pagpahimulos sa mga fixers sa maong buhatan. Gitumbok sa atong impormante nga kini sila si Andres, Julito ug Totong maoy igmat ug listo kaayong mangagni sa mga aplikante.
Matud sa atong impormante, korneron nila ang mga aplikante. Kun masulod na sa iyang laang, bunalan dayon sa makabungog nga bayranan. Labina kanang mokuha og exam, segurado gyud nga ilang mapanguwartahan og maayo. Pastilan! Kanus-a pa man intawon mapitol ning mga tawhana, uy! Attention, NBI!
* * *
“Good noon, Sir. Diha sa CIP ang porter dako kaayo’g gipangayo nako. P300 ang duha ka bag kay P100 kuno ang plite sa kariton bisan og duol ra kaayo. Akong gihangyo, gipabayad kog P170 sa duha ka bag.” -- 0929-6988710 (Sent:February 14, 2008--12:14:26pm)
Aduna gyuy mga porter nga mangigo sa mga pasahero gikan sa barko. Ang maayo ninyong buhaton, makigsabot mo sa porter sa dili pa kamo mokuha sa ilang serbisyo. Sabotan ninyo ang presyo o ang kantidad nga ilang pangayoon sa dili pa kamo mahinayak aron pagseguro nga dili kamo mailad.
* * *
(Sumbong ug reklamo? Text sa 0910-8105522)