Sa makausa pa, handumon sa nasud ang kasumaran sa pagkamatay sa nasudnong bayani nga si Dr. Jose Rizal karong adlawa.
Matag Rizal Day ang mga gipamulong ni Rizal niadtong buhi pa siya mahinumduman ug gani anhi dinhi kalagmitan nasentro ang kasaulogan sa iyang martyrdom.
Usa sa mga gipamulong ni Rizal nga kanunay hisgutan sa atong henerasyon mao ang: “The youths of today are the fair hopes of the Fatherland.” Dakong pagsalig ni Rizal sa kabatan-onan. Relevant kon tukma pa ba ang pulong ni Rizal kaniadto sa situwasyon karon?
Tukma pa. Duna pay relevance. Apan kun buhi pa ang atong bayani karon masagmuyo gayud siya sa daghang mga batan-on nga nahisalaag. Pag-adis-adis, pagbarkada, pag-apil-apil sa mga praternidad diin daghan sa mga sakop badlongon mao karoy buhat sa mga batan-on.
Apan dili hinoon tanang batan-on ang nagpabadlong. Ang kadaghanan mahimo pang tawgon nga “fair hopes of the fatherland.” Kining maong mga batan-on wala mopakyas kang Dr. Jose Rizal sa iyang dakong pagsalig nganha kanila.