Ang malinawon unta nga kasaulogan sa miaging Pasko apan kini namansahan sa pinusilay sa duha ka polis diin ang usa niini namatay.
Nahitabo kini dihang ang usa sa duha ka polis samtang nagmaoy sa kahubog nakamugna og kahadlok sa mga lumolupyo sa Brgy. Tisa ning siyudad. Misumbong ang mga taga Tisa ngadto sa kwartel sa kapolisan ug ang ikaduhang polis maoy nitubag sa alarma.
Ang panag-atubangay sa duha ka polis miresulta sa pagpinusilay diin ang giingong hubog nga polis maoy natodas.
Ang maong duha ka polis mga Police Officer One (PO1). Tungod sa kadaghan nang hitabo diin nalambigit ang mga PO1 kami nisugyot — ug among sublion ang maong sugyot — nga ipaubos ang tanang PO1 nga polis nga na-involved kon nalambigit sa kuwestyonableng buhat sa usa ka higpit nga disiplina ug kadtong dili na matabang, taktakon sa serbisyo.
Sa samang higayon, kadtong mga PO1 nga mipakita og tiunay nga dedikasyon sa ilang pagpanerbisyo hatagan og insentibo aron ilang ipadayon ang ilang sinserong pagtuman sa ilang katungdanan.