Wa pa gyud diay mawad-ig maayong kabubut-on ug bulawanong kasingkasing ang mga Sugbuanon.
Kini ilang gipakita sa walay pag-ukon-ukon dihang abtik nga miresponde sila sa pagtabang sa nagbangutan nga pamilya ni PO1 Noriel Luage nga namatay sa kamot sa usa ka kriminal nga iya untang arestohon.
Si Luage usa ka batan-on ug bagitong polis kang kansang kaisog ug kamatinud-anon sa iyang katungdanan isip polis maoy hinungdan nga siya namatay.
Dalaygon ang gipakitang dedikasyon ni Noriel sa iyang obligasyon isip sakop sa kapolisan ug dalaygon usab ang reaksyon sa Sugbuanong katilingban sa bayanihong kamatayon sa batan-ong polis.
Dili mahinungdanon ang kantidad sa kuwarta nga gilimos ngadto sa banay ni Noriel. Ang mahinungdanon mao ang gipakitang bulawanong kasingkasing sa mga sakop sa atong katilingban.