Atong gihangop ang pagpasiugda sa Kasadya sa Colon, dili lang tungod kay gihimo kining kabahin sa pagpasamot sa kasadya sa paskohanong selebrasyon kundili usab sa paghatag og dugang kinabuhi sa dalan nga giilang labing unang business street sa nasud.
Ang Colon isip karaang kalye sa negosyo -- diin nisugod pa gani kini panahon sa Katsila -- gihulga na ning panahona sa mga dagkong shopping malls sa uptown area apan nagpabilin gihapon nga sentro sa mga patigayon sa downtown district.
Salamat sa mga negosyante nga nagpabilin ug gani mipalambo pa sa ilang pamatigayon sa Colon.
Ang pagsaulog sa Kasadya sa Colon walay duhaduhang makahatag og dugang kinabuhi sa karaang dan aron kini magpabilin nga sentro gihapon sa patigayon bisan pa sa pag-uswag sa negosyo sa ibabaw nga dapit sa dakbayan.
Busa angay lang nga atong suportahan ang maong kalihukan nga gipasiugdahan sa kagamhanan sa siyudad.