Badlongon gyud ning mga dispatser. Mang-harass sa mga driver. Manghulga kun dili hatagan og kuwarta. Masuko. Hilas kaayo. Mora bag silay hawod ug ang mga driver ilang mga ulipon. Sila pay mangayo, sila pay maghinawod.
Usa ka magbabasa ning lindog mi-text nga nagkanayon: “Good day, Sir. Kana bang manindahay diha sa eskina sa Urdaneta St. nga tiguwang ug daot, dispatser kana siya. Kusog kaayo na mangdispats sa mga driver sa PUJ nga mobiyaheg Mandaue. Kun dili hatagan, masuko ug bunalan ang sakyanan. Tag P20 ra ba ang pangayoon. Tigulang na siya nga taas og buhok unya daot ang lawas. Salamat.” -- 0919-4325096 (Sent: 03:46:11pm-- October 21, 2007)
Tiguwang na pero nagpabadlong pa gihapon. Unsa kahay gusto niyang legacy nga ibilin niya sa iyang mga kaliwat. Kanang iyang pagpangdelihinsiya sa mga PUJ driver? Pakauwaw lang! Klaro baya kaayong extortion kana. Pabaga sa nawong! Daghan kaayong paagi nga makasapi kita. Nganong ang pagpangdispats man gayod ang iyang gihimo nga nakapuwerhisyo siya sa mga driver sa PUJ?
Uy, Manong, igo na nianang imong pagpabadlong. Husto na sa imong pagpabaga sa imong nawong. Hunong na nianang imong pagsamok-samok sa mga driver sa PUJ. Illegal baya kanang imong gihimo. Bisan asang anggulo tan-awa, wala kay katungod sa pagpangayog P20 sa mga driver sa PUJ.
* * *
Sa gula sa Banat News niadtong Oktubre 20, 2007 gihisgotan nako dinhi ang mahitungod sa abusadong mga driver nga matawag tang reckless kaayo sa iyang pagmaneho. Nakadawat kog daghang text nga nagpadayag sa ilang sentimento mahitungod sa abusadong driver. Wala gyud sila mahimuot sa mga driver nga reckless.
“Experience nako sa 3 years nako sa Japan. Wala ko kakita og mga reckless driver didto kay estrikto ang ilang policy. Bawal man ngadto nga suborno. Mao walay abusado. Sinsero sila kay kun badlongon ka sa katilingban bisan kuwartahan ka dili sila moila, silotan gyud. Ilaha ngadto way dato ug way pobre nga level sa balaod mao nga way abusado.” -- 0906-5423483 (Sent: 09:13:43pm-- Oct. 20, 2007)
(Sumbong ug reklamo? Text sa 0910-8105522).