Gikumpirmar sa hepe sa kapolisan dinhi sa dakbayan ang paglihok sa narcopolitics atol sa miaging barangay ug SK elections.
Gani matud ni Sr. Supt. Patrocinio Comendador duna gyuy mga kandidato nga gidudahang gipaluyohan sa mga drug lords nga nakadaog. Ang kompirmasyon gihimo ni Comendador human duha ka mga pildirong mga kapitan nga sila si Marciano Ando sa Carreta ug Fortunato Parawan sa Lorega-San Miguel namasangil sa ilang mga kaatbang nga gisuportahan sa mga drug lord hinungdan nga kini midaog batok nila.
Samtang gikompirmar ni Comendador ang report nga dunay mga kandidato nga gipaluyohan sa mga drug lord, nagdumili siya sa pag-ila sa mga pangan sa mga kandidato. Admitido sab si Comendador nga lisod ang pagtaral sa maong mga tawo sa hukmanan sanglit wa silay ebidensiya paghimo niini. Kun tinuod nga gipaluyohan sa mga drug lord ang kaatbang nilang Ando ug Parawan nganong karon pa sila mikisi-kisi human sa eleksiyon nga sila pildi na? Nganong wa man sila moreklamo niadtong wa pa ang eleksiyon?
Samtang tinuod dili imposible nga aktibo ang narcopolitics atol sa eleksiyon apan di sab makiangayon nga ang mga pilderong kandidato magpataka lang og pamasangil og way igo nga ebidensiya.
Akong hagit nilang Ando ug Parawan probahi ninyo ang inyong pamasangil kay ang sample ballot nga dunay gisukip nga P500 dili igo nga ebidensiya nga drug money ang kwarta nga gigamit.
Unsaon man pagprobar nilang Ando ug Parawan nga ang kwarta nga didto sa sample ballot gikan to sa drug lord? Kun mao lang ni basihanan nilang Ando ug Parawan sa ilang pamasangil ang haum nga paghulagway nila mao nga sila pulos “ignorante”.
Ambot og unsay kursong nahuman ning maong mga pilderong kapitan nga irihis man ang sinultihan.
Di kong molalis nila nga posibling namalit gyud tinuod og boto ang ilang mga kaatbang, apan ang pamasangil nga gisuportahan kini og mga drug lord, alang nako usa ka iresponsabli nga pamasangil nga kun di silang kasuporta og lig-ong ebidensiya maayong taralon sa hukmanan.
Kun ako pay kontra sa politika niining maong mga kapitan, di ko gyo’ng palabyon ang maong mga pamasangil sigurado gyud nga ihurot ta mo og kiha.
Tiaw mo’y imo nga akusahan ang tawo nga gisuportahan sa mga drug lord nga sa laing pagkasulti protector sila sa mga durugista?
Dako sab ni nga hagit nilang barangay captain-elect Lorenzo Monsanto ug Eduardo Lauron nga probahan nga way basihanan ang pamasangil batok nila pinaagi sa pagpakita og maayong programa batok sa illegal nga drugas.
Kun wa mo’y himuon sa suliran sa drugas diha sa inyong barangay magtuo ang publiko nga tinuod nga suportado gyud mo sa mga drug lords.
* * *