Kun tinuod nga si Rodulfo Atega ug kauban mao ang mitulis sa Penbank kaniadtong miaging Martes sa dakbayan sa Mandaue, tabla pay gitamparos sa mga tulisan sa makaduha ang atong kapulisan. Dinhi makaingon ta nga ang atong kapulisan igo lang giduwa-duwaan sa mga tulisan. Si Rodulfo Atega giingon sa atong kapulisan nga sakop sa Bohol Robbery Group nga mihimo na og taas-taas nga kutay sa pagpanulis dinhi sa Metro Cebu Areas. Usa siya sa gipasakaan na og kasong Robbery ug Homicide gumikan sa ilang pagtulis sa salapi sa La Nueva Supermart nga ikarga na unta sa armored van sa Metrobank ug mipusil sa duha ka mga escort guard sa banko kaniadtong miaging semana.
Tungod sa nagsunod-sunod nga mga pagpanulis si Mayor Tomas Osmeña mibasol ngadto sa mga negosyante nga nanag-iya og mga business establishment dinhi sa Sugbu gumikan sa pagmagahi niini sa pag-subscribe sa Mobile Alarm System kon MARS nga dako og ikatabang sa seguridad sa ilang mga negosyo. High-tech man ugod kining MARS nga diin sa usa lamang nimo ka pagpindot sa imong celphone anaa makatubag dayon ang atong kapulisan. Mao nga kini ang gihugtan sa pagduso sa mayor aron malikayan kun dili man masulbad ang mga kaso sa pagpanulis dinhi sa Sugbu.
Makatabang man ang Mobile Alarm System aron malikayan ang mga posibling pagpanulis dinhi sa dakbayan apan dili gihapon kini makasulbad sa mga pagpanulis kun ang atong mga police dili seryoso sa ilang trabaho. Mag-unsa man ang Mobile Alarm System kun ang police wa diha kay toay gilakaw kay nangutang ug ang usa nagpaayo sa iyang motorsiklo.
Ang tulis wa unta mahitabo kaniadtong miaging semana kun didto pa sa ilang puwesto ang mga police nga nadistino.
* * *
Ang tulis nga nahitabo diha mismo sa tumoy sa ilong sa atong halangdong mayor usa ka tamparos ngadto sa iyang liderato ug sa liderato sa atong kapulisan. Hagit usab kini ngadto kanila nga kanunay lang gipikatan sa mga tulisan.