Gikan sa cellphone number 0926-9471022: “Good day, Sir. Bag-o pa ko nagrehistro sa akong motorsiklo sa Danao. Unya ilang gi-smoke emission test. Tingala ko kay P400 man ang gipangayo nako nga bayad. Unsa man na? Sa Mandaue P270 daw ang bayad. Unsa may kalainan sa smoke emission test (Set) sa Danao ug Mandaue? Why man dako ang ilang pangayo sa Danao LTO? Thanks. -- 0926 (07:34:11--Aug. 2, 2007)
Wala koy ideya kun unsay kalainan sa smoke emission test sa Danao ug Mandaue. Kun tinuod nga P270 ray bayad sa SET sa Mandaue ug P400 sa Danao, tinuod nga dako gayod ang kalainan sa presyo. Ang pangutana kun nganong naingon man kini niini?
Ato ning ipatubag niadtong suheto mahitungod sa smoke emission testing. Bukas kining lindog alang niadtong may kahibalo bahin niini aron maoy moedukar nato kun nganong mahal man ang bayad sa smoke emission testing sa Danao kay sa Mandaue. Mao ba gayod kini ang regulasyon? O dunay nanapi alang sa kaugalingong bolsa?
* * *
Usa sa komon nga modus operandi sa mga badlongon sa katilingban sa siyudad mao ang panguot. Nagsauysaoy ang daghang mga mangunguot sa dakbayan. Mahimong nagsunod siya kanimo samtang nagsubay ka sa aseras. Posible usab nga gikatupad mo siya sa imong pagsakay og PUJ. Maong pagbantay gayod kanunay.
Usa ka magbabasa ning lindog mi-text nga nagkanayon: “Usa ako sa suki ninyong magbabasa. Ako mismo nakakita sa mga mangunguot ug celfone. Magdala sila og dagko nga bag. Makaila na ko nila kay pirme ko sa Mandaue. Anha sila sa Subangdaku maghuwat og daghang manakay nga pasahero sa jeep. Mag-ilog-ilog kunohay sila pagsakay pero manguot diay.” -- 0920-7292161
Angay bantayan kining maong estilo sa modus operandi. Sa inyong pagsakay og PUJ, bantayi gayod kanang tawo sa inyong luyo. Sagad ra bang mahitabo nga iduotduot kamo nila. Makig-ilogay sila sa mga pasahero sa pagsakay. Pero lain ra diay ang ilang tuyo. Pahimuslan nila ang higayon samtang linga ang mga pasaherong mag-ilogay pagsakay. Manguot pod sila. Busa, pagbantay!
(Sumbong ug reklamo? Text sa 0910-8105522)