Ang giingon sa armadong kusog sa nasud nga makabungog nga opensiba batok sa mga armadong sakop sa MILF ug Abu Sayyaf didto sa Basilan gi-time out una. Naoktaba.
Seguradong kini gikalipay sa mga bandido ug terorista. Seguradong nangakatawa kini. Ug tingali miyagayaga kini ngadto sa militar sa nasud.
Ang pagpospon sa giingong dakong opensiba nakahatag og kahigayonan sa mga rebelde sa pagpangandam ug pagpalig-on sa ilang depensa samtang giplanohan pa sa Armed Forces kun kanus-a sila moataki.
Kini sumala sa mga eksperto sa mga estratehiya kalabot sa giyera.
Dili maayong signal ang nahimo sa pagpasibog sa opensiba batok sa mga bandido ug terorista. Mipakita nga ang armadong kusog ug ang Pangulo nag-ukon-ukon pag-ataki sa mga sad-an.