Bisan hugtanong giyam-iran sa mabuot nga mga butante ang political dynasty, apan ang resulta sa eleksiyon niadtong Lunes daw sa di kapugong sa pagsulbong sa bag-ong dinastiya sa politika dinhi sa Sugbu. Ang trend sa canvassing nagpakita nga gawas sa bag-ong mandato nga makuha ni Gov. Gwendolyn Garcia, ang iyang amahan mao na say bag-ong kongresista sa segundo distrito samtang ang ilang kamanghuran nga nagsilbi niyang consultant sa Kapitolyo hayag na pud ang kadaugan isip kongresista sa tirsiro distrito. Gani sila si kanhi Gobernador Pablo Garcia ug manlalaban Pablo John Garcia pulos na nangangkon og kadaugan batok sa ilang mga kaatbang. Si Pabling, kinsa usa sab ka batikang abogado ug nailang constitutionalist, miingon nga kapin sa 35 mil butos ang iyang labaw sa iyang mga hugot nga kaatbang nga si bokal Carmiano Kintanar. Si Pablo John sa iyang bahin miingon nga mokabat sab og 15 mil ang iyang mayoriya batok ni bokal Estrella Yapha, asawa ni kongresista Antonio Yapha, nga pildihonon sab pagkagobernador. Ang tataw nga kadaugan sa tulo ka mga Garcia nakapatuaw sa kadaghanan ug nakapaabli sa atong mga mata nga di tanang dinastiya sa politika ang gikasilagan sa mga butante. Sa gisulti na ni Gobernador Gwen Garcia sa dihang miduso sila sa ilang mga kandidatura nga ang usa kuno ka Garcia nga way nahimo daghan ra kaayo nga mokandidato, apan ang tulo ka Garcia nga tinud-anay sa ilang pag-alagad ug panirbisyo sa katawhan dyutay ra sab kaayo. Dungan sa ilang pag-angkon og kadaugan, akong gipangutana si Pablo John ug si Gob. Pabling kon unsay sekreto sa mga Garcia nganong taliwa sa negatibong kampanya sa kadaghanan sa pagtukod og dinastiya sa politika wa ning makaapekto sa ilang mga kandidatura. Ang ilang tubag simple, matud nila nga nakit-an sa mga Sugbuanon ang ilang matinud-anon nga panirbisyo. Ang popular kaayong prinsipyo nga ilang gisunod mao nga “buhat maoy pasultihon, dili sulti maoy pabuhaton.” Ang matang sa pamolitika sa mga Garcia nga sa akong tan-aw maoy nakabuntog sa pagdominar sa pamilyang Yapha sa tirsiro distrito ug sa pagsiak sa solidong distrito sa mga Martinez didto sa kwarto distrito mao ang wa pagsunod sa karaang istilo nga pagkamaginukdanon. Wa sagupa sa mga Garcia ang istilo sa ilang mga kaatbang nga gukdon ang ilang mga kontra ug di hatagan og mga mehoras. Ang ilang istilo namatud-ang epektibo ug naayonan sa katawhan. Kon gustong lumpagon sa mga kaatbang sa mga Garcia ang ilang liderato, angayan siguro nilang kombinsihon ang katawhan nga kaya nilang labwan ang mga nahimo sa maong pamilya. Apan ang dakong pangutana kon motuo pa ba ang publiko nila nga sud sa taas nga panahon nga sila naghupot sa katungdanan wa man gyud silay nahimo gawas sa pagpadato sa ilang kaugalingon.
* * *