Buot ipasabot dinhi, nga dili gasto sa mga kandidato. Hinungdan nga tapus sa eleksiyon, inighatag nilag kwentada kon pilay ilang nagasto sa eleksiyon, gamay ra kaayo ang ilang gasto, within the Comelec limits. Silang tanan, despite sa minilyon nilang mga gasto, di gyud ma-charged og overspending tungod kay gigastoan man sila sa ilang mga FRIENDS.
Ug inig-ingon gyud sa mga kandidato nga gigastoan sila sa ilang mga FRIENDS, motuo lang pod ang Comelec. Dili nila subayon kon kinsa kini nga mga friends, kon tinuod ba gyud nga sila ang nigasto, o gigamit lang ang ilang mga ngalan.
Nganong di man ni sotaon sa Comelec? Pila ra may pagsubay kon kinsa kini nga mga FRIENDS, unsay ilang mga negosyo o trabaho nga generous man kaayo paglabay og pila ka milyon ka pesos, aron i-donate ngadto sa ilang mga FRIENDS nga kandidato?
Perhaps, duna gyuy pipila ka mga FRIENDS nga tinuod gyung mibayad sa mga political ads. Apan, di ko motuo nga sa ka-mahal karon sa maong mga advertisement, ang tanan gyud sa maong mga ads, gibayran sa mga FRIENDS sa mga kandidato.
Ikaw, Dro, kanang mga poster, mga leaflet, mga tarpaulin, mga TV ug radio ads, mga print, ug uban pang mga campaign materials, motuo ka nga kining tanan gibayran sa mga FRIENDS sa mga kandidato?
Kon di ka motuo, nganong motuo man ang Comelec?
Ambut pila na ka eleksiyon ang milabay sa atong kinabuhi, ug sukad, wa gyud ta kadungog nga misuway ang Comelec pagsubay o pag-ila kinsa kini nga mga FRIENDS, ug tinuod ba gyud nga sila ang mibayad sa mga political ads sa ilang mga FRIEND CANDIDATES.
Unya, inig-submit sa mga kandidato sa ilang mga gasto sa eleksiyon, motuo lang pod dayon ang Comelec, nagpasabot nga way usa sa mga kandidato ang mamakak. Ngiga no? Pagka-honest sa atong mga kandidato! Pagkabuotan!