Usa ka texter nagkanayon: "Good day. Akong ireklamo kining badlongon nga taxi driver. Nakuha nako ang plate number sa taxi. Gikan mi sa Carbon padulong sa Wireless. Dili lang daw mogamit og metro kay layo. Pakyaw lang og P150. Wala mi mosugot mao nga nigamit siyag meter kay mokanaog man unta mi. Ang among nabayran P75. Tibuok P100 ang among kuwarta nga gihatag. Ang iyang gisukli P10 ra. Sakto ba ni?" -- 0920-8270299 (January 29, 2007 --13:09:02)
Base sa imong text, atong masuta nga kon misugot ka pa sa pakyaw nga P150, puwerteng dakoag ginansiya ang taxi driver. Katunga ang iyang maginansiya sa usa niya ka pagbiyahe. Kini sa walay pagkuwenta sa iyang bahin (kon bahinon pa ang paagi) sa P75 nga inyong gibayran. Ugaling kay boundary man ang patakaran karon sa paabang og taxi. Pero makaginansiya lagi ang driver. Ug dako kaayo silag kitaon sa pakyaw-pakyaw nga paagi. Tinunga ang ilang patong sa balayranan.
Pero nausahan gihapon ka sa maong taxi driver kay ang tibuok P100 nga imong gitunol isip bayad gisuklian na man lang og P10. Angay unta nga P25 kay P75 ra man ang inyong bayronon. Dako gyud ning sayop. Nganong wala man sab mo moreklamo dayon ngadto sa maong driver nga hayag pa man sa pagsubang sa adlaw nga kulang gayod ang kantidad nga iyang gisukli ninyo?
Mao kiniy sakit sa mga tikasan ug badlongon nga taxi driver. Kon ang pasahero dili mosugot sa kondisyon nga pakyaw-pakyaw, dili sab hatagan og hustong sukli. Ambot kun matul-id pa ba kaha kining maong mga driver nga balinuhot kaayog utok? Morag dili na tingali kay grabe na gyud katikasan kining ubang mga driver.
Ang akong ikasugyot mao nga kon kursonada ka gyud, ipadangat ang imong reklamo batok sa maong driver ngadto sa buhatan sa transportasyon. Sayon ra man dakpon ang maong driver kay nakatimaan ug nakuha man nimo ang plate number sa iyang taxi.
(Sumbong ug reklamo? Text sa 0910-8105522)