Wala mag-inusara ang mister sa megastar tungod kay modagan usab isip independent candidate si Senate President Manuel Villar kinsa suod niyang higala ug sakop sa gitawag nga "Wednesday group" sa senado. Ang maong lakang sa duha ka senador ang labing maayong diskarte aron siguradong modaog karong eleksyon. Nagtuo ko nga may igo nang "track record" ang duha ka magpasubling senador aron makab-ot ang bag-ong katungdanan gikan sa mga botante. Wala magpanuko si Villar ug Pangilinan nga mag-inusara sa pagdagan ug dili magpasakop sa kampo ni Presidente Arroyo o kampo ni kanhi Presidente Estrada tungod kay mas dako pa ang kahigayonan nga modaog sila nga walay laing pangalan o grupong dad-on gawas sa ilang tagsa-tagsa ka panga 'n.
Adunay igong makinarya ug salapi si Villar ug Pangilinan aron modaog sa eleksyon sa Mayo. Gawas sa taas nga puntos sa survey, may mga alas pa ang duha ka senador aron subling mapili sa pagkasenador. Kung bida si Villar sa negosyo niyang "low cost housing" sa tibuok nasud, gipasigarbo usab ni Pangilinan ang iyang mga programa labi na sa kabataan. Ipuno pa ang alas ni Pangilinan., ang iyang misis nga si Sharon Cuneta nga sayod na tanan nga may minilyon ka mga fans sa tibuok nasud.
Karong nagpadayon ang kumbati ug pagbalitok sa mga magpapili sa pagka senador tali sa duha ka grupo, mas maayo nang mangita og laing diskarte ang mga politiko. Dili Unity Party ug United Opposition ang magsangka karong eleksyon apan imahe ug baruganan ni kanhi presidente Joseph Estrada ug Presidente Arroyo ang nakita nakong magkumbati karong piniliay. Kung usa ka kandidato nga dili buot mamantsahan sa dungog sa duha ka habig, mas maayo pang maningkamot ka og imoha tungod kay mas hayag pa ang kahigayonan sa imong pagdaog.
Apan depende ang tanan sa kuwarta ug makinarya. Kung usa ka politiko nga sinsiyo lang ang su'd sa imong bulsa ug wala ka pay mga maayong nabuhat aron imong ikapasigarbo atol sa imong kampanya, imo nalang tunlon imong prinsipyo aron magpasakop sa administrasyon o oposisyon. Pulos may mga buling sa ilang dungog ang duha ka grupo labi na kung ang ilang mga lider ang hisgutan nga si Arroyo ug Estrada. Dinhi sa Pilipinas, nga mas pang gihatagan og gibug-aton ang dungog sa partido inay sa matag kandidato, siguradong maapektuhan ang dungog sa mga magpapili nga may limpyong panga'n karong nagpasakop sila sa duha ka dagkong grupo sa politika.
Apan sa usa ka nasud nga gikaluhaan na sa pamolitika, dili kompleto ang eleksyon kung wala ang ingon ining klaseng mga senaryo. Kung may kandidatong mobalhin sa pikas grupo, aduna say kandidato nga kalit nga motapon sa iyang kontrang partido. Kung adunay ubang kandidato nga pugos nga magpasakop sa usa ka partido, aduna say ubang kandidato nga padayong gi-aghat nga magpa-ubos sa usa ka partido. Kung may mga politiko nga walay igong katakos nga magpapili, aduna say mga politiko nga naniguwang nalang sa politika ug buot gihapong magpapili.
Nagkadaiyang diskarte sa politika nga dinhi lang sa Pilipinas nimo makit-an. Apan kining tanan maoy nakaingon nganong mas makalingaw, mabulukon ug kontrobersiyal ug gipaabot ang piniliay. Iya-iyang lakang ug diskarte alang sa nag-inusarang motibo ug kana mao ang pagdaog ug pagkuha sa suporta sa mayoriya sa mga botante. Apan ang padayong panghinaot nga dili lang kutob sa eleksyon ang diskarte apan hangtud na sa ilang paghupot sa katungdanan ug pagserbisyo sa katawhan alang sa mas malambuong katilingban.