Kining maong dapit maoy angay nga butangan og flyover aron ang mga sakyanan nga mosubay sa P. del Rosario nga mopaingon sa Natalio Bacalso Avenue.
Sa dugay na nakong pag-agi-agi diha, nasuta nako nga dili man kaayo problema ang mga sakyanan nga nagsubay sa Osmeña Blvd kon itandi sa mga sakyanan nga nagsubay sa P. del Rosario.
Unsay ikasulti nimo Higalang Congressman Raul del Mar? Nasuheto ka ba sa traffic diha sa dapit nga akong gihisgotan? Angay gayod nga butangan og flyover ang maong dapit.
Nakahigayon ko sa pagpakighinabi ni DPWH district engineer Nicomedes Leonor didto sa City Council kaniadtong Miyerkules, apil siya nga misuporta nga angay'ng butangan og flyover ang maong dapit.
Apan ang rason diay nga wala dayon kini butangi mao nga nanagana sila sa plano nga kon mahinayon na ang pag-operate og Light Railway Transit sa Sugbo, anha man moagi sa maong dapit.
Aw mao diay.
Paita aning ubang drayber uy, igo lang nakakat-on pagpadagan og sakyanan ug wala masayod sa tukmang lagda. Resulta, makahasol sila sa ubang motorista.
Nasayod ko nga wala sila mahibawo nga dunay lagda nga kon hinay ka nga mopadagan sa imong sakyanan, adto ka mosubay sa labing daplin dapit sa tuo, dili sa wala.
Daghan kaayo ang mga drayber nga ignorante sa mga balaud sa tukmang pagmaneho ug sakyanan.
Kagahapon, didto sa South Coastal Road, nasundan nako ang usa ka multi cab nga pwerte, mora'g nag-ihap sa tuyok sa iyang ligid.
Pastilan, maayo unta og dili manakod ang pagka-ignorante niadtong maong drayber. Dinhing dapita nga wala ko modayeg sa mga examiner sa LTO.
Dili unta tugotan nga mo-drive og sakyanan kining maong matang sa mga tawo.
May paliton unta ko nga balay sa usa ka subdivision sa Consolacion, apan dihang pag-adto nako pwerteng dugaya nako nga nakalusot tungod sa hinay kaayong managan nga mga Multicab unya magpatunga pa g'yod sa karsada, miatras ko uy.
Palihug, mga tinugyanan diha sa LTO, ayaw mo pagbasta-basta nga mohatag na lang og lisensya bisan mga walay kasinatian sa pagmaneho og sakyanan.
Wala hinoon masayod si Konsehal Jocelyn Pesquera kon pila ang kantidad sa multahan sa dakbayan ngadto sa Commission on Audit tungod sa kapakyas pagpatuman sa NGAS.
Kini maoy dakung tahas karon sa hepe sa Management Information Computer Services nga si William Artajo sa pagpalambo sa serbisyo sa iyang departamento.
Giangkon ni Artajo nga daghan sa iyang mga sakop ang tingali maantigo, apan nagkinahanglan pa og dugang pagbansay-bansay aron molambo ang ilang kahibalo og mopaspas ang ilang serbisyo.
Tan-awon nato ang labok ni Mr. Artajo.