Mga sikyu way training

Laing malampuson nga tulis ang nahitabo kagahapon duol sa usa ka dakong mall sa dakbayan sa Sugbo.

Ang mga sikyu wala gyud intawon makapalag, bisan ang usa kanila nakakasa sa iyang shotgun apan gidul-itan na diay sa sumbohan sa armas sa usa sa mga tulisan.

Sa sunodsunod nga mga nahitabong tulis dili lang sa dakbayan sa Sugbo, makaingon kitang dili garantiya ang guwardiya nga malayo sa tulis ang usa ka establisamento.

Daghang nahitabong tulis nga wala gyuy mahimo ang mga guwardiya, may pipila nga natipi gyud ang guwardiya kay gibirahan sa tulisan, sama sa nahitabo kaniadto sa Metrobank sa Mango Avenue ug sa Dranix Distributors sa Basak San Nicolas.

Hangtod walay reporma nga himuon ang ahensiya sa gobyerno nga nag-superbisar sa mga security agency, magpadayon ang mga hitabong pagpanulis bisan sa presensiya sa mga guwardiya.

Kadaghanan sa mga security agency napakyas pagpahigayon og 'tactical training' sa mga guwardiya, busa wala silay kasayuran unsaon pagdepensa ang establisamento nga ilang bantayan ug dili makamao mosulbad engkaso may mahitabong tulis ug pagpangatake sa kliyenteng ilang bantayan.

Ang maayong himuon nianang mga security agency mao ang pagpahigayon og subsob nga training, bisan tinuig lang, sa mga guwardiya sama sa 'close quarter battle' (CQB) ug 'combat crisis management' iyawat makatabang kanila engkaso may maabot nga mga tulisan sa ilang mga establisamentong bantayan.

Sa akong nasayran, ang mga guwardiya nga mopahigayon og training alang sa ilang lisensiya, igo ra gyud pasulayon og pabuto og armas, dili gani pasulayon sa aktuwal nga pagdepensa pinaagi sa mga 'simulation training' ug uban pa nga makatabang sa ilang pagka-guwardiya.

Maayo gani may mga dagkong security agency nga dili manawat og mga aplikante pagka-sikyu kun wala mamaksulay og ROTC. Maayo na lang kay may pipila nga mga kanhi sundalo ang mga guwardiya.

Apan kun walay seasonal nga training, wala gihapon kini mahimo kun planado sa mga tulisan ang ilang mga lihok pagtulis sa usa ka establisamento kun wala silay kabangkaagan pagpakigbatok pinaagi sa close-quarter combat.

* * *

WAY SILBE. Migawas na hinuon karon nga walay silbe ang mga guwardiya nga gipamutang sa mga establisamento tungod kay wala gyud kini nahimo.

Wala gyuy laing sulbad niini gawas sa pagpataas sa 'police visibility' ug ang pagbalik sa beat patrol sa kapolisan.

Dili man ugaling mababagan ang plano sa mga tulisan, apan kun adunay mga polis nga naglaroylaroy sa dalan, makatabang kini paggukod gilayon ug ang daling pagresponde engkaso makamatikod nga may establisamento nga gitulis.

Apan kun pabiling nagmika sa ilang tagsatagsa ka police station ang mga polis, yano ra'ng lakton sa mga tulisan ang palibot sa establisamento nga ilang biktimahon.

* * *

SIPSIP. Kun dili ma-renew ang appointment ni Dr. Rene Josef Bullecer, mosamot akong pagtuo nga gihugpaan sa mga sipsip ang Cebu City Hall.

Adunay huhungihong nga dili na gustong i-renew ni Mayor Tomas Osmeña ang appointment ni Bullecer tungod lagi kay wala kini nahimo sa mga law-ay'ng mga kalihukan sa mga bikini bar sa dakbayan.

Nasayod ko nga nasayod si Tomas nga dili ingon niana kasayon nga pasirad-an ang mga law-ay'ng mga bar sa dakbayan pinaagi sa operasyon sa Cebu City Anti-Indecency Board (CAIB) kun walay koordinasyon sa mga polis.

Luoy kaayo kun ang CAIB lang ang pasanginlan. Tataw'ng sa papel lamang ang ilang gahum ug dili ma-enforce kun may mga opisyal sa kapolisan ug sa siyudad nga nagprotiher sa mga bar.

Apan, nganong midaghan man ang mga bikini bar? Wala diay nahimo ang mga departamento nga agian sa ilang mga papales sama sa clearance gikan sa City Health Department, business permit section ug uban pa?

Klaro man nga daghan og kalapasan sa balaod ang mga bikini bar, ilabi na kanang mga bikini bar sa Sanciangko nga nanguhong lang.

Tugotan nga modaghan unya ang CAIB ang pasanginlan?

May nakahunghong kanako nga adunay interesado sa posisyon ni Bullecer ug mao kini nagsige og karga og estorya ni Tomas nga walay performance si Bullecer.

Dili ko motuo nga kun ilisan si Bullecer moundang na ang mga law-ay'ng pasundayag sa mga bikini bar. Kaniadto pa kanang mga law-ay'ng pasundayag, wala gyud mahunong, bisan niadtong mga tuig nga wala pa si Bullecer.

Ang akong gikuyawan, ang mopuli ni Bullecer mohimo na hinuong raket sa iyang posisyon, pagpangilkil nianang mga bikini bar sa dakbayan.

Akong usbon, dili intawon garantiya nga ang mopuli ni Bullecer makapahunong sa mga hubo-hubo sa mga bikini bar, makasumpo sa mga salidang malaw-ay ug makapaundang sa pagpamaligya sa mga bastos nga DVD sa Colon.