Usa sa mga giimbitar nga motambong sa maong election summit mao ang Catholic Bishops Conference of the Philippines (CBCP).
Ang pangu sa CBCP nga si Arsobispo Angel Lagdameo sa Jaro, Iloilo City, misalikway sa imbitasyon kay matud niya dili na kinahanglan pa ang election summit kon ang tanan mosaad lang ngadto sa ilang kaugalingon ug sa Ginoo nga sila maninguha nga motabang sa pagpalimpyo ug paghimog malinawon sa umaabot nga piniliay.
Ang mga gipangimbitar sa gihisgutang election summit mao ang Comelec, PNP, mga political parties, ug uban pang mga pundok.
Kini sila bisan pa'g walay election summit komitido sa pagtabang ug paghimo nga limpyo ug malinawon nga piniliay. Ila kining tahas ug kinahanglan nga ilang tumanon.
Busa husto ang pangu sa CBCP sa pagbalibad sa imbitasyon ni Presidente Arroyo. Wa na kinahanglana ang summit kon ang matag usa sa giimbitar motuman lang sa ilang obligasyon isip election watchdog.