Proseso sa pagparehistro

Ang katapusang adlaw sa Disyembre 2006 mao usab ang katapusang adlaw sa pagparehistro aron maka-apil sa umaabot nga piniliay. Sumala pa sa Korte Suprema sa kaso nga gisang-at sa Akbayan, ang maong deadline dili na mahimong mauswag, ug kon ugaling uswagon man kining maong tagal, gikinahanglan nga usa gayud ka balaod ang ipasar sa Kongreso ug dili lamang resolusyon gikan sa COMELEC.

Ubos sa balaod nga RA 8189, ang pagparehistro karon gitawag nga Continuing Registration. Buot ipasabot, nga sa wala pa mapupos ang tagal isip deadline, kada adlaw ting-opisina mahimong makaparehistro didto sa buhatan sa COMELEC. Dili na pareha kaniadto nga maghulat kon kanus-a ang mga adlaw nga gitakda sa pag-parehistro aron adto maghugop didto sa eskuylahan aron marehistro.

Kon kaniadto ang pagparehistro mao lamang ang pag-adto sa eskuylahan aron pagsulat sa porma sa rehistro, karon ang pagrehistro taas-taas na nga proseso. Ang pagsulat sa porma sa rehistro giisip na lamang nga pag-apply para marehistro, ug gikinahanglan pa nga bistahon sulod sa tulo ka bulan kon ma-aprobar ba ang pagrehistro. Sa maong bista, kadtong adunay reklamo sa application mahimo pang mopadangat sa ilang oposisyon ngadto sa Registration Board. Ang mga posibleng sukaranan sa oposisyon mao ang kakulang sa edad sa aplikante, o wala kini nagpuyo sa lugar nga nasakop sa presinto, o ba hinuon nga dili kini usa ka Pilipino.

Ang aplikante kansang application wala ma-aprobar sa Registration Board mahimong mopasang-at ug petisyon sa Municipal Trial Court alang sa Inclusion proceedings. Sa samang paagi, ang opositor sa aplikante kansang application gitugotan sa Registration Board bisan wala kini makatuman sa mga rekisitos, mahimong mopasang-at sa maong korte og petisyon alang sa Exclusion proceedings.

Mahimo nga morehistro ang mga walay grado o adunay diperensya sa lawas inubanan sa ilang assitor. Diha sa ilang application, ilang isulat ang ilang pagkabutang aron matugotan ang laing tawo o assistor nga maoy mosulat sa ilang application.

Ang botante nga narehistro makabaton og Voter's Identification Number kon VIN, nga gilangkoban sa mga nag-unang letra sa iyang ngalan, sa Urban Code sa iyang lugar, sa iyang petsang natawhan ug sa numero sa iyang presinto.

Kadtong mga papeles sa narehistrong botante mamahimong Book of Voters, nga pagaselyohan ug ablihan lamang sa petsa nga itakda sa COMELEC, ug paga-obserbahan sa mga kandidato o partido nga interesado sa maong kalihokan.

Alang sa inyong mga panahon ug reaskyon, palihug e-mail sa aries1258@excite.com o text sa 0915-5536986. Daghang salamat