Una niini mao ang pag-apruba sa Ubos Balay Balauranan sa balaudno'ng nagdugang og P125 nga across-the-board sa matag adlaw nga suholan sa mga mamumuo. Usa kini ka maayo nga kalamboan taliwala niining kalisod nga atong natagamtaman karon.
Sa boto nga 151-0 pabor sa pagpasar sa maong balaudnon, maisip nga taktika kini sa mga kongresista human sa mga pagsaway nga ilang naani gumikan sa pagdali pag-usab sa Batakang Balaud.
Maisip usab nga sukli kini sa ilang bulilyaso tungod sa ilang paglingla sa katawhan kinsa wala motuo sa ilang pasiatab nga ang pagdali sa pag-usab sa Konstitusyon maoy bugtong solusyon sa kasamtangang krisis nga mihapak sa politika ug ekonomiya.
Apan bisan pa man, angay'ng gihapon natong hangpon kining maong lakang sa Ubos Balay Balauranan nga dugang suholan sa inadlaw'ng kita sa mga mamumuo. Dako kini'g ikatabang ning panahon sa nagkadaiyang problema nga mihapak sa katawhang Pilipino.
Hinaut nga ang Senado mopabor usab sa maong balaudnon sa mga kongresista. Hinuon wala pa masayri ang baruganan sa mga senador kalabot niini. Ug kon mouyon sila sa maong proposal, usa unya kini ka dakong pinaskohan nga madawat sa mga mamumuo kinsa dugay rang naglunang sa kalisod tungod sa kalulang sa ilang inadlaw'ng kita.
Klaro nga masagmuyo ang mga negosyante niining maong kalamboan ug nga buhaton gayud nila ang tanan aron dili makapasar sa Senado ang maong balaudnon. Apan dili usab angay'ng ikapanghambog sa mga magpapatigayon nga dili gayud paigo ang kasamtangang suholan nga ilang gihatag sa ilang mga mamumuo.
Angay hunahunaon sa mga senador nga angay usab nga hatagan ang mga mamumuo og igong suholan aron makasagubang sila sa ilang inadlaw'ng panginahanglanon. Kini tungod kay ang presente'ng suholan sa Central Visayas nga P241 matag adlaw dili gayud paigo ibuhi sa usa ka mamumuo nga nagbaton og pamilya.
Gumikan usab niining maayong kalamboan, angay lamang nga kunhoran ang pletihan sa mga pampasaherong sakyanan, ilabina sa mga jeepney. Dako na ang pagkubos sa presyo sa gasolina sukad pa sa nanglabay'ng mga bulan ug angay lamang usab nga makabenepisyo ang sumasakay'ng publiko niini.
Apan ang sektor sa transportasyon nagdumili gihapon pagsanong sa mga panawagan pagkunhod sa pletihan taliwala niining mga sunod-sunod nga pagkubos sa presyo sa lana. Gani, ang mga opisyal sa mga grupo sa transportasyon nagpakabungol gihapon sa mga hangyo sa ubang sektor pagkubos sa pletihan bisan pa man sa dako na nilang kita mugna ning pagkubos sa presyo sa gasolina.
Sa ako nang gikaingon, hinakog kining maong klase sa baroganan. Ug gusto siguro ning mga operator ug drayber sa mga pampasaherong sakyanan nga sila lamang ang mabulahan niining pabor nga gihatag sa mga tigbaligya'g gasolina.
Angay usab unta nilang hunahunaon nga dili lamang sila ang naapektohan sa krisis nga mihapak kanato karon. Ug ang pagkubos sa pletihan maoy usa sa ilang paagi pagtabang pagpagaan sa gipas-ang kalisod sa publiko nunot niining maong krisis.