Kay matud pa ni Dakay nga sama sa pagpaabot sa katawhan kun kanus-a matapos ang kalibutan, angayang ingon sab kuno niini ang buhaton sa publiko ug sa hingtungdang mga estudyante sa ilang imbistigasyon nga gihimo batok sa pari.
Buot pasabot ni Dakay nga magpaabot ang publiko sa way kinutoban kun kanus-a nila humanon ang ilang imbistigasyon ug kun kanus-a sila makahunahuna paglihok alang sa imbistigasyon. Laktud nga pagkasulti, wa gyu'y plano ang simbahan nga hatagan og kwentada ang publiko kun unsay tinuod sa maong pasangil.
Kay unang lugar, padayong nagmagahi hangtud karon ang simbahan nga itug-an kun kinsa ang pari nga gireklamo.
Ikaduha, matud ni Dakay di kuno tanang tinuod kinahanglang isulti tungod kay ang gisugo kuno sa Ginoo mao lang nga dili mamakak. Kini maoy hinungdan nga bisan nasayod sila sa tinuod apan ilang gipanalipdan, pabilin silang nagpakahilom tungod kay di sila gustong mabisto sa ilang pagpamakak.
Inay nga iyang itug-an kun kinsa'y nga'n sa pari, gilabay ni Dakay ang hagit ngadto sa mga sakop sa media nga mao kuno'y angayang motug-an kinsay ngalan sa paring lampingasan. Matud ni Dakay nga kun dali kunong ginganlan sa media si Fr. Joey Belciña nga gipasanginlan kaniadto nga nanglugos way rason nga di hinganlan sa media ang pari nga gipasanginlang nagbinastos sa mga tinun-an sa Abellana.
Pastilan nimo Msgr. Dakay, unsaon man paghingalan sa media nga inyo mang gitaguan ang maong pari. Akong hagit nimo, ayaw'g tago-i ang iyang pagkatawo kay akong ipaniguro nimo nga amo siyang nganlan sa way lipod-lipod.
Dunay sukaranan ang kahingawa sa kadaghanan nga ang bag-o pa untang nakapahuway nga nasud ta gikan sa lapad nga mga lihok protesta tungod sa mga isyong politikal matay-og na sab pagbalik sa mosunod nga mga adlaw tungod sa gihimo sa mga hakog sa gahom tang mga kongresista.
Ang Catholic Bishops Conference of the Philippines ug ang grupo ni Bro. Mike Velarde mibahad na nga ilang dad-on pagbalik sa karsada ang isyo sa gitinguhang kausaban sa atong Batakang Balaud. Kini tungod sa pagpasar sa kongreso og resolution nga mag convene sa House of Representatives alang sa Constituents Assembly aron pag-usab sa batakang balaud apan wa nay labot ang Senado.
Gihimo ni sa mga kongresista human nila unang giamendar ang ilang kaugalingong house rules nga di na kinahanglanon nga moagi sa proseso sama sa mga balaudnon nga magkinahanglan og conconrence sa Senado ang gitinguha nga pag-usab nila sa batakang balaud.
Ang maong lakang sa mga kongresista gihulagway ni nga usa ka paagi pagdali sa gitinguha nga pag-usab sa constitution. Tumong niini mao nga kapugngan ang eleksiyon sunod tuig.
Si House deputy speaker Raul del Mar admitido nga mao ni'y mamahimong samputanan. Apan iyang giklaro nga di angayang mabalaka ang publiko tungod kay moagi pa kuno ni og plebisito. Sa ato pa-isumitir ngadto sa katawhan kun mosugot ba sila nga i-uswag una ang eleksiyon karong Mayo 2007 hangtud nga mahuman ang bag-ong constitution.
Kun mao, nganong ato mang pugson ang paghimo niini kun atong malapas ang gilatid sa batakang balaud? Unsa may atong dalian? Aron magpabilin pa sa gahom ang mga kongresista nga di na kapapili sa umaabot eleksiyon? Ambot nganong wa gyud makaila og delikadisa ang atong mga kongresista.