Bag-o pang niabot si Montanez niadtong hapon sa Disyembre 17 gikan sa iyang duty sa dihang gipahibawo siya nga dunay grupo sa mga tulisan nga namusil didto sa ilang barangay. Isip polis mipatigbabaw ang iyang pagtuman sa iyang gipanumpaang katungdanan bisan pa kun wa siya madistino dinhi sa dakbayan kaysa iyang katalaw.
Mirespondi si Montanez sa dapit diin maggikan ang buto-buto sa mga armas diin niadtong tungora duna nay duha nga samaron, lakip na sa usa ka kanhi sakop sa army. Apan mao palang gani'y iyang paggawas sa ilang pinuy-anan, mipaka ang buto sa armas, misunod ang pagpamanhod sa iyang abaga ug walang bukton ug maoy iyang nakita nga miaso na ang iyang abaga agi sa bala nga diriyot mokutlo sa iyang kinabuhi.
Bisan kun siya samaron, misungasong ang maong pulis ug nakigsinukliay og bala sa grupo sa mga tulisan nga gipangulohan nilang anhing Romeo Rico ug Alberto Palaw. Si Rico hinuon una nang mibakasyon sa way pagbalik human patya sa giingong mga vigilantes.
Didto sa tambalanan, si Montanez diriyot gyud bawii sa iyang gininhawa tungod sa daghang dugo nga miagas gikan niya. Gani matud sa maong pulis nga miduaw sa among buhatan kagahapon nga 20 nalay iyang dugo sa dihang giatiman siya sa mga doktor.
Swerte pa gihapon si Montanez nga bisan kun ubos na kaayo ang iyang dugo nidawat pa gihapon ang iyang lawas sa giabunong dugo ngadto kaniya. Apan taliwa sa bayanihong nabuhat ni Montanez subo nga palandungon nga way bisan pikpik nalang sa abaga nga iyang nadawat gikan sa iyang mga opisyal agi'g pagpasalamat sa gihimo niini.
Didto sa iyang katre sa tambalanan way bisan anino sa iyang mga opisyal nga mipakita aron pagpasidungog sa iyang gihimo. Ang responsabling mga opisyal angayan untang molihok paghatag og pasidungog sa mga sakop sa kapolisan nga sama ni Montanez tungod kay pinaagi niini makahatag kini'g kadasig kanila nga motrabaho bisan sa kakuyaw nga ilang sudlan.
Angayan untang gihimo sa mga opisyal sa kapolisan dinhi sa Rehiyon ug sa hepe mismo ni Montanez diha sa CPPO mao ang paghatag og medalya didto pa sa tambalanan ug ang pagrekomendar kaniya alang sa spot promotion.
Di man siguro bug-at alang nilang Sr. Supt. Vicente Loot ug ni Chief Supt. Silverio Alarcio ang pagpirma og rekumendasyon ngadto sa National Police Commission nga i-promote si Montanez. Di pa hinuon uwahi ang tanan, mamahimo pang hulipan ang nalangan nga pasidungog alang sa maong polis, hinaot nga bisan sa ka busy nilang Alarcio ug Loot sa preparasyon sa ASEAN summit ilang masukip ang pagpirma og commendation alang ni Montanez.
Bisan kini nalay pinaskuhan nga inyong ihatag sa usa ka tarong ug bayaning pulis sa atong kapanahunan nga sama ni Montanez aron pagdasig sa uban pang mga batan-ong pulis nga mohimo sa iyang gimbuhaton sa way kahadok.
Nailhan ni pinaagi sa mga ebidensiya nga nahipus sa Australian Federal Police kinsa mi wiretap sa telephone conversations sa mga sakop sa sindikato. Lakip sa mga nailhan mao ang usa ka politiko ug upat ka mga negosyante.
Kudos sa paningkamot ni Cuenco uban sa deputy director sa NBI nga si Reynaldo Esmeralda. Apan hangyo sa mga sugboanon ngadtong Cuenco ilakip pod ang pagsusi kun kinsay local contacts sa sindikato nga nag-operate sa mega shabu laboratory diha sa dakbayan sa Mandaue.
Puslan man nga nasugdan na ni Cuenco ang maong krusada angayang ipursigir pod niya ang pagpangita sa mga konsabo nilang Calvin Tan ug mga kauban nga giingong maoy financier sa mega shabu laboratory diha sa Mandaue.