Si Haring Santiago sa Inglatera usa niana ka adlaw, ang napungot sanglit nahanaw man ang mahinungdanong papeles. Iyang napasanginlan ang iyang sulogoon nga kusganong namalibad nga dili siya ang nakawala niini. Apan tungod sa kalagot, ang hari nanukmag kaniya. Wala dangti og dugay, nahiabot ang usa sa iyang mga opisyales nga nagdala na sa nawalang papeles. Gipatawag og balik sa hari ang iyang nasumbagang sulogoon ug sa tumang pagpaubos siya nangayo og pasaylo ug iya siyang gidalitan og mas daghan pang mga pabor sa umaabot.
Pamalandong
Dili maayo nga magpadaog kita sa kasuko kay diha usahay sa kasuko nakalimot kita nga dunay pangisip nga sarang magamit aron paghunahuna sa mga butang nga angayang buhaton. Kay usahay ang kasuko maghimo kanatong mga tawo nga mga bogo.