Ania ang mga rason nga mora'g makatoo ko nga tapolan sila. Kamong pirmi nga mag-agian sa aseras, tan-awa ra god kon naatiman ba nila ang mga tindahan sa mga sidewalk vendors?
Wala ko mosupak nga dunay sidewalk vendors nga maninda sa aseras, kay ila man usab kining panginabuhian. Apan klaro kaayo ang lagda sa City Hall nga "one side vending" ra ang itugot.
Aron masabtan sa mga sakop sa Squatters Prevention Encroachment and Elimination Division, kinahanglang usa ra ka linya ang mga tindera, apan karon nag-atbangay baya sila diha sa aseras.
Unsay resulta? Maglisud ang mga tawo nga moagi sa aseras ug maoy rason nga adto na lang sila moagi sa karsada ug makamugna kini og problema sa trapiko.
Sayop si retired Major Vicente Mercado, ang hepe sa demolition team, sa iyang pag-ingon nga maghuwat g'yod sila sa kamandoan sa mayor sa tanan nilang kalihukan.
Siya si Mercado ang mihatag kanako kaniadto sa legal opinion sa city attorney's office nga nagtataw nga wala na kinahanglana ang pirma sa mayor kon mohimo sila og operation sa mga tindera nga nagbutang og estante diha sa aseras.
Nalimot ka Sir? Ang rason ni Mercado nga gipanglaayan kuno ang iyang mga sakop kay kon maghimo sila og operation, mokalit lang og abot si Gerry Marquez og maoy molaban sa mga vendors.
Kon tinuod man gani kini, tawga ko kay bisan og duna pa ko'y laing appointments, moresponde dayon ko og sawayon nako si Mr. Marquez.
Ang tinuod, kini sila si Marquez ug Mercado pulos nako mga suod kaayong higala. Apan kon dunay usa kanila nga magbinuang nga dili motuman sa trabaho nga gitahas kanila, dili ko magpanuko pagsaway kanila.
Sama ra sa pagsaway nako ug pagyamiid sa pipila ka opisyal namo sa Lorega-San Miguel nga utro pang mga ligoy kay wala makasumpo sa illegal parking diha sa among barangay.
Kamong mga kawani sa gobyerno, trabaho g'yod mo sa katungdanan nga gitahas kaninyo. Maayo man lang mo modawat sa inyong mga sweldo ug honorarium.
Sa gibalik-balik na nako pag-ingon, kon dili ninyo makaya ang trabaho nga inyong gihuptan, labing maayo nga mang-resign mo sa inyong trabaho.
Karon diay nag-text nako nga mireklamo na usab sa mga abusadong tigbaligya og buwad diha sa dalan Tres de Abril, dapit sa Taboan market.
Ang mga tulda niining maong mga tindera makabalda sa pag-agi sa mga sakyanan. Ang nag-text nako gianognan nga namatay na tawon si Jojo dela Victoria kay mao ra kuno to'y aktibo nga mikampanya paglimpyo sa karsada.
Balikon nako Major Mercado, kon tinuod man nga dunay mga opisyal sa City Hall nga magdupa-dupa kon pangsakmiton na ninyo ang ilang mga baligya ug ang mga estante, tawga dayon ko.
Pamatud-i nga sayop si Marquez sa iyang pag-ingon nga mga tapolan mo sa inyong trabaho.
Tiaw mo, dili paagian og mga sakyanan ang pipila ka karsada kay anha moagi ang mga delegado?
Pwerteng hasola niini kay dili man holiday. Nagpasabot nga mopadayon sa pagtrabaho kitang nagtrabaho sa mga pribadong sector.
Hahay, paita.