Gitambongan kini sa mga lain-lain nga mga sakop sa ahensya sa gobiyerno ug mga stakeholders. Diha usab si Konsehal Edu Rama aron paghatag sa Welcome Address.
Sa maong seminar, mihatag og pahimangno ang POEA aron makalikay sa illegal recruitment, labi na karon nga nagpakadungog na usab kita og mga reklamo gikan sa mga biktima: mga biktima nga igo lang gipabayad apan wala gyud makalarga; ug mga biktima nga nakalarga man tuod apan walay klarong sweldo ug proteksyon sa gobiyerno tungod kay wala marehistro isip OFW.
Pipila sa mga pahimangno naglakip niining mosunod:
1. Ayaw pag-aplay sa mga ahensya nga dili lisensyado sa POEA;
2. Ayaw pagdawat og trabaho sa ahensya nga walay job order;
3. Ayaw pakig-transakyon sa mga tawo nga dili awtorisado nga empleyado bisan kon nagdala kini sa ngalan sa lisensyadong ahensya.
4. Ayaw pakig-transaksyon sa gawas sa opisina o sa lisensyadong adres sa ahensya;
5. Ayaw pagbayad og placement fee nga mosobra sa usa ka bulan nga sweldo;
6. Ayaw pagbayad og placement fee kon walay resibo ug kontrata sa pagtrabaho;
7. Ayaw dayon pagtuo sa mga anunsyo nga nagsugo nga ipadala ang inyong bayad ug papeles sa usa lamang ka PO Box address;
8. Ayaw pakig-transaksyon sa mga ahente sa Training Centers o Travel Agencies nga mohagad og trabaho sa gawas sa nasud;
9. Ayaw pagdawat og Tourist Visa para sa pagtrabaho sa gawas sa nasud;
10. Ayaw pakig-transaksyon sa mga fixers.
Ang pinaka-dili peligro nga paagi sa pagbaton ug trabaho sa gawas sa nasud mao ang pag-aplay sa mga ahensya nga lisensyado sa POEA o pag-aplay sa mga placement sa gobiyerno nga gitugotan sa POEA.
Angay usab nga hibaw-an nato nga dili lamang ang mga peke nga mga ahensya ang makahimo sa kalapasan sa balaod, kondili bisan usab kadtong mga lisensyado. Busa ang pinakamaayo nga buhaton mao gayud ang pagbasa pag-ayo sa kontrata sa dili pa mopirma niini o dili pa mohatag ug bayad.
Alang sa inyong mga panahom ug mga reaksyon, palihug e-mail sa aries1258@excite.com o tawag sa 0915-5536986. Daghang salamat.