Si education consultant Joy Augustos Young miingon nga niadto pang miaging tuig niya girekumendar kang Oliva nga hunongon ang mga seminar nga sama niini labi na og panahon sa tingklase tungod kay makabalda ni sa pagtuon sa mga estudyante.
Admitido si Oliva nga iyang nadawat ang maong rekumendasyon gikan sa dakbayan niadtong tunga-tunga sa miaging tuig apan wa niya kini tumana. Kini tungod kay nagtuo siyang makaayo sa mga tinun-an ang paghimo og mga seminars nga sama sa gipasiugdahan sa Oasis of Love.
Gani bisan pa sa nahitabo sa 19 ka mga tinun-an sa Abellana wa gihapon siyay plano nga hunongon ang maong praktis. Nagtuo si Oliva nga wa ning kabalda sa pagtuon sa mga bata kini taliwa sa iyang pag-angkon nga dunay mga klase nga gibiyaan ang mga tinun-an nga biktima sa pagbinastos sa pari sa dihang mitambong sila sa seminar.
Tungod niini, matud ni Young nga iyang awhagon si Mayor Tomas Osmeña nga lakip si Oliva imbistigahon tungod sa wa niini pagsunod sa rekumendasyon sa dakbayan. Ang pangutana, unsa may gahom sa dakbayan nga mohimo og imbistigasyon batok ni Oliva?
Unsa man say kapuslanan niini nga wa may administrative jurisdiction ang local government unit batok sa DepEd? Mamahimo bang silotan sa mayor si Oliva kon mamatud-ang duna siyay pagpabaya?
Ang angayan sigurong buhaton sa dakbayan mao ang direkta na nga pagrekumendar ngadto sa kadagkuan sa DepEd nga hulipan si Oliva inay nga maghago-hago sila sa paghimo og imbistigasyon.
Alang nako di kapanghunaw si Oliva og responsibilidad sa maong hitabo tungod kay dugay na diay siyang giawhag sa dakbayan nga hunongon ang paghimo og mga seminar nga sama niini. Ikaduha, tataw ang pagtabon ni Oliva sa pari nga responsabli sa maong linoog ug yawan-ong binuhatan.
Lisod tuohan nga wa silang kaila sa pari nga maoy responsabli kini tungod kay dunay pagtugot sa DepEd ang maong seminar. Buot bang ipasabot ni Oliva nga basta lang makasud ang magpailang pari diha sa mga tunghaan nga way pagsusi kon tinuod ba silang pari?
Kinsa man diay nag-imbitar sa maong mga pari nganong wa may bisan usa sa mga opisyal sa DepEd ug sa eskwelahan nga nakaila?
Ang kadagkuan sab sa simbahan angayang di maglipod-lipod sa tinud-anay nga pagkatawo sa maong pari. Nganong ihikaw man sa simbahan ngadto sa publiko ang pagtug-an kon kinsa ang maong pari? Kon kusog nga modemanda og transparency ang simbahan ngadto sa mga ahensiya sa gobiyerno, angayan nga mao sab ni ang ilang buhaton sa higayon nga dunay ilang mga sakop nga malambigit sa seryosong mga pasangil.
Sa akong nabantayan, nabatasan na sa simbahan ang paglipod-lipod ug dayag nga paglaban sa ilang mga sakop nga mapasanginlang nalambigit sa kahiwian. Ang simbahan maoy angayang maghatag nato og maayong sumbanan sa kanunay nilang gipanawagan sa atong gobiyerno nga mamahimong transparent.