Tiningob nga pag-ampo sa mga kalag ug santos,
Kay giwala naman ang adlaw,
Alang sa mga kalag nga nagtuwaw?
Ning dakong selebrasyon nga atong saulogon,
May dako nang ka-usaban sa una tang na-andan
Kay ang adlaw sa mga Minatay sa ikaduhang adlaw
Karon wala na ug kini nahanaw!
Ngano man? Nga mga kaigsoonan tang mipahulay na
Mao ma'y tumong kining adlawa,
Nga kahatagan ug Espesyal nga Pag-amoma,
Labi na gayod kadtong nahikalimtan na
Ginoo, uban ni Ma. Santisima among Inahan,
Kanimo among ihalad mga kalag nga tanan,
Nga unta sila dili mo hikawan,
Labi na ang mga kalag nga anaa pa sa kangitngit
Ihikaw ayaw mga kaigsoonan ko
Ang kinasingkasing tang mga pag-ampo,
Dili sa karon lang adlawa,
Kon dili adlawng tanan kini gayod pagahimo-a
Kanatong mga buhi nahisandig ang ilang kaluwasan
Ning mga mipahulay nang mga kaigso-onan
Ihikaw ayaw ang imong mga pag-ampo,
Sa tanang takna ug sa tanang gutlo!
Langitnong Amahan ning kalibutan namong nagkaguliyang
Hasta selebrasyon nga maoy naandan,
Gihikaw kanamong katawhan,
Intawon hayagi na mga alimpatakan ning among Pamunu-an!
Todos los Santos uban sa mga kalag nga nag-antos
Makadimdim na unta intawon sila sa dugos
Sa Gugma'g Kalooy sa Amahang bug-os,
Nga moganoy na kanila ngadto sa Kinabuhing Tim-os!
Pahulay Nga Dayon Ihatag Ginoo Sa Mga Kalag Nga Tanan - Amen!