Human unya sila matambalan ibalik sila sa ilang mga tagtungod aron maatiman ug malimpiyo na sa hingpit ang atong dakbayan gikan sa mga buang nga naglibod suroy. Nindot ug dalaygon ang maong plano kon tinuod pang gihimo kini sa dakbayan.
Apan di ni maoy naobserbahan sa publiko tungod kay igo lang gigamit ni Carillo ang mga buang alang sa iyang propaganda aron humot siya labi pa nga hapit na ang eleksiyon. Human mapatik sa mga mantalaan ug makita sa telebisyon ang ilang gihimo nga pag-rescue kunohay sa mga libod suroy nga mga buang gibuhian kini ug namalik ra pod sa kadalanan.
Nabistong pagpamakak ni Carillo sa dihang ang hepe mismo sa psychiatric ward sa Vicente Sotto, Dr. Renato Obra, mitug-an sa tulomanong Lintunganay sa DYLA nga wa silay mahimo gawas pagbalik sa mga buang diha sa kadalanan tungod kay way ikapakaon ang tambalanan niini.
Si Obra miingon nga di silang kalahutay pagtambal niining maong mga buang hangtud nga sila mamaayo sa hingpit tungod kay way pundo ang gobyerno alang niini. Labing dugay nga ma accommodate sa VSMMC ang mga buang sud lang sa lima ka adlaw.
Kon ingon niini ang sitwasyon ug sigurado kong nasayod niini si Carillo, nganong kinahanglan niyang patoohon ang publiko nga ilang tambalan ang mga buang hangtud kining mamaayo sa dili pa itugyan pagbalik sa ilang pamilya?
Nganong di prangkahan ni Carillo ang publiko nga way pundo ang gobyerno nga magamit aron pagtambal nila ug nganong kinahanglan tang magpakaaron ingnon atubangan sa atong mga bisita?
Sila si Gov. Erico Aumentado sa Bohol nga maoy presidente sa ULAP ug si Konsehal Carlo Fortuna, secretary general, miingon nga nanubra ang Korte Suprema sa ruling niini tungod kay mituki kini sa isyu nga angayang ang Commission on Elections na maoy mosusi.
Si Fortuna ug Aumentado miingon nga di husto ang pag-ingon sa korte suprema nga giilad sa ULAP ug Sigaw ng Bayan ang katawhan sa pagpapirma sa petition tungod kay matud pa wa masunod ang mga requirements nga gilatid sa balaud.
Matud nila nga di trabaho sa korte suprema ang pagtan-aw og nasunod ba ang mga requirements tungod kay ang taas nga hukmanan dili "trier of facts" kon dili maoy angayang mo-interpret sa balaud.
Nunot niini, ilang gitinguha nga moduso og motion for reconsideration sa hukom sa korte suprema labi pa nga usa lang ka boto maoy ligas. Nangugat ang mga opisyal sa ULAP nga di tinuod nga nangilad sila sa publiko sa pagpapirma tungod kay matud nila ilang gipasabot ug giedukar og maayo ang katawhan nga namirma niini.
Pastilan, kinsa may ilaron nilang Aumentado ug Fortuna? Kon mismo sa mga importanteng dokumento nga sagad nagkinahanglan natong pirmahan di na gani ta mobasa niini og klaro usa mopirma unsa pa kaha niini labi pa og dunay nanampiling nga itunol.
Ang mga kabus nga maoy sagad himoon tadtaran sa mga politiko sa ilang mga pagpakaaron ingnon di na maghuna huna kon makaayo ba o dili ang ilang gipirmahan alang sa nasud tungod kay ang gilantaw niini nga dunay ikadalit nga pagkaon sa lamesa alang sa nagkutoy nga tiyan sa mga nagpaabot niining pamilya.
Gawas pa nabutang karon sa seryoso nga kahimtang ang posisyon sa ULAP nga nasuta nga di diay ni maoy baruganan sa tanan nilang sakop. Ang treasurer sa ULAP nga si James Marti Lim miingon nga di unta angayang dad-on ni Aumentado ang ULAP sa iyang pagsuporta sa petition sa Sigaw ng Bayan alang sa people's initiative tungod kay basi sa ilang charter kon dunay usa nga mosupak di na nila mahimong gamiton ang ilang organisasyon paghimo og baruganan.
Si Lim miingon nga wa siya mouyon sa pagsuporta sa people's initiative tungod kay wa ni madiskutir og maayo nilang mga opisyal.