Bitayon ang PRC

Ang Professional Regulation Commission (PRC), dili ang kontrobersiyal nga leakage sa Nursing Licensure Examination (NLE) niadtong Hunyo ning tuiga maoy angay'ng tulisukon sa eskandalo nga nitay-og sa propesyon. Segun sa Court of Appeals (CA) ang leakage sa pipila ka pangutana wa makabuong sa kinatibuk-ang pasulit. Apan ang pag-usab-usab sa PRC sa grado sa mga nikuha sa pasulit maoy nakatuman sa wa mahimo sa leakage, ang pagpahimutang sa pagduda sa kaligdong sa mga pasulit di lang sa nursing kon sa uban pang mga propesyon nga ilang giduma.

Sa ato pa, samtang husayon pang mga pasangil batok sa duha ka sakop sa Board of Nursing (BON) ug 17 ka mga opisyal sa tulo ka review centers nga gipasanginlan sa leakage, ang CA nibitay nang daan sa PRC nga sad-an sa "... illogical, arbitrary and patently erroneous" ug "gravest abuse of discretion..." nga paglubag sa mga grado sa mga gradwado sa nursing.

* * *

Ang mosunod nga dagkong atraso sa Resolution 31 nga giumol nilang PRC Chief Leonor Tripon-Rosero ug kaubanan maoy gikastigo pag-ayo sa CA:

• Ang pagpaburot sa PRC sa passing rate gikan sa 41.24% ngadto sa 42.42% gideklarar sa CA nga dakong kalapasan sa Nursing Act of 2002;

• Ang paghagbong sa PRC sa 1,186 nga nakapasar unta sa pasulit gihulagway sa hukmanan seryuso nga pag-abuso sa ilang gahom;

• Ang pagpapasar sa PRC sa 1,687 nga nangahagbong unta sa pasulit gitumbok sa CA nga "whimsical and capricious."

Atubangan ning pagtataw sa CA sa unsay dugay nang nahibaw-an sa kadaghanan-taphaw nga liderato sa PRC nga inay mosulbad mao na man hinuoy nipasamot sa krisis-isalikway ba lang ni Pres. Arroyo ang nasudnong interes ug palabihon gihapon ang ilang kasuod ni Rosero, ang iyang personal nga dentista?

* * *

Sa pikas nga bahin, ug mao ni hinungdan sa dagkong pahiyom sa Sugbuanong board passers ug ilang mga ginikanan, gibasura sa CA ang awhag sa retake sa NLE nga dakong inhustisya sa examinees kay:

• Una, di lapad ang leakage; ug

• Ikaduha, lisod ang pag-ila sa mga tinun-an nga nakapahimus sa leakage.

Gimandoan hinuon sa CA ang National Bureau of Investigation (NBI) sa padayong pag-ila sa mga nakapasar tungod sa leakage aron kasilotan sila pinaagi sa retake sa Test 3 ug Test 5.

* * *

Sa labing bag-ong pagpapating ug pagpabaga, si Rosero nipahibawo nga iya nang papanumpaon ang tanang 17,322 ka board passers karong buntag. Apan sa di pa na mahitabo, kinahanglan nga ilhon una sa PRC ang:

• 1,186 nga nangahagbong apan ilang gipapasar; ug

• 1,687 nga nakapasar apan ilang gihagbong.

Ang 2,873 ka examinees, nga mahimong maglakip sa pipila ka Sugbuanon, magpatara ba lang sa bangis nga pagduwaduwa nilang Rosero ug kaubanan sa ilang kadungganan?

Email: leo_lastimosa@abs-cbn.com