Lisud apason ang hunahuna ni Mayor Soc nganong iyang giilad ang mga sakop sa media niadtong Lunes pagpatawag og press conference tungod kay matud pa iyang pasurenderon o ipadakop si Joavan.
Apan sa pag-abot sa mga sakop sa media sa Talisay City Hall, nagpa-presscon man tuod kini apan gibandilyo ni Mayor Soc ang affidavit of desistance sa tulo ka biktima ni Joavan. Walay nahitabong pagpa-surrender ni Joavan, ug labaw nang walay nahitabong pagdakop.
Dili nato mapugos si Mayor Soc pagpapapas sa iyang amahanong gugma ngadto kang Joavan, apan, por dios por santo, maayong lantawon unta niya nga iyang kridibilidad pagpa-presscon aron lang protehian ang badlungon niyang adopted nga anak.
Una sa tanan, ang media pa gyud ang iyang giilad.
Sa presscon pa lang daan, gihanigan na ni Mayor Soc ang tanan pinaagi sa pagpanghimakak sa wala pa i-akusar ngadto kanila nga mibakwi sa nahauna nilang akusasyon batok ni Joavan ang tulo ka biktima nga sila si Timoteo Aleo, Edmund Ong ug Carlos dela Calzada bugti sa salapi.
Hinuon, katungod sa pamilyang Fernandez ang pagdangop og bisan unsang remedyo nga anaa sa balaod.
Apan maayong hagiton ta silang Aleo, Ong, ug dela Calzada pagpatim-aw aron sayran nila ang publiko unsay nagtukmod nila pagpirma og affidavit of desistance.
Apan alang nako, walay bili kanang affidavit of desistance nilang Aleo, Ong ug dela Calzada.
Mahimo kanang i-deny sa korte sa ngalan sa hustisya alang sa Republika.
Ang kasong kriminal, ilabi na ang pagpatay, usa ka public crime. Dili bastabasta nga i-atras lamang kini sa gusto sa mga biktima.
Busa, bisan walay kooperasyon nga ihatag ang biktima ngadto sa kagamhanan nga nagpadagan sa kaso (sama sa mga prosecutors) mahimong ipadayon ang kaso, ilabi na kun makita sa korte nga may kalambigitan ang pamilya sa akusado pagpaatras sa kaso pinaagi sa paghaylo og salapi o kaha pagpanghadlok (force, intimidation, etc.) kanila.
Mao man gani nga kasagarang mahitabo, adunay hearing nga himuon ang korte pagdeterminar sa gibug-aton sa affidavit of desistance.
Duha na ka tuig ang milabay, walay kasong napasaka ang Philippine Drug Enforcement Agency (PDEA-7) batok sa mga tawo nga responsable sa pagpayuhot niini dinhi sa Sugbo.
Ambot nganong hangtod karon, wala pa gyuy gikiha ang PDEA nga mao ra man unta kini ang ilang trabaho - ang paggukod sa mga tawong nalambigit sa ginadiling drugas.
Apan, si Kongresista Antonio Cuenco nagkanayon nga i-focus niya ang ipatawag nga hearing sa pagtan-aw sa integridad sa ebidensiya tungod sa report nga gipamalhin ngadto sa sako ang maong kemikal gikan sa gisudlan niining oak barrel.
Apil sa sumonan ni Cuenco mao sila si kanhi NBI-7 Director Reynaldo Esmeralda ug Customs Police chief Capt. Isidro Estrera.
Ang akong nahinumdoman, kadtong customs police nga maoy mibutyag sa maong ilegal nga importasyon sa pseudoephedrine nga si Lt. Danny Gonzales nakadawat na sa P100,000 nga reward nga gihatag sa kagamhanan sa dakbayan sa Sugbo.
Apan si Gonzales atua na karon sa Cagayan de Oro madestino isip deputy commander sa Customs Police sa Cagayan de Oro.