Sa Lawis Alaska

Nauso ug midagsang pag-ayo karon ang tulis. Ang labing sayon nga prospek sa mga tulisan mao ang mga taxi ug PUJ. Kon taxi, ang driver maoy tulison sa iyang pasahero. (Diha hinuon poy higayon nga ang driver sa taxi maoy miunay pagtulis sa iyang pasahero). Kon PUJ, mosakay ang mga tulisan ug maoy biktimahon ang mga pasahero. Usahay, ilakip pagbiktima ang driver sa PUJ.

Angay panid-an sa atong mga awtoridad kon asa magdansohan kining mga tulisan aron sayon ra silang sikopon sa higayon nga maghimo silag kadaot. Kon ang kapolisan masayod kon asa ang dapit diin sagad anha moatake ang mga tulisan, dili na kaayo lisod ang pagbaling kanila. Seguradong marekupo gayod sila.

Niay tip nga gihatag sa atong texter: "Diri sa Mambaling naay daghang tulisan namuyo sa Lawis Alaska. Ang uban nila anha ra manulis sa taytayan sa SRP." -- 0918-2414716 (August 21, 2006 -- 16:58:21)

Usa ka concern citizen ang nagpadangat niining maong kasayuran kanako. Walay sukaranan nga magtumo-tumo siyag sulti busa angay natong tuohan ang kasayoran nga iyang gihatag. Makatabang kini sa mga awtoridad pagsumpo sa mga tulisan. Gikinahanglan man kaha nato ang kooperasyon sa mga lungsoranon aron pagsumpo sa mga badlongon? Angay natong hatagan og pagtagad ang gi-text niyang kasayoran.

* * *

Niadtong Agosto 31, 2006 dunay nagpadala kanakog makadisturbo nga text. Nakugang na lang ko kay gikasab-an man ko dayon sa nag-text nako nga unta wala man ko makaila niya. Wala lang ko magtagad kay misantop sa akong hunahuna nga tingalig na-trip-pan lang ko sa mga walay lingaw.

Pero pagkaugma, Septiyembre 1, mi-text nako pag-usab ang maong numero. Dili na pangasaba ang iyang gi-text kondili usa na ka panghulga. Iya kuno kong patyon. Mao kini ang iyang numero: 0910-5287585. Nagplano ko nga paimbestigahan nako kining tag-iya niining numeroha. Kon may kasayoran sab mo kon kinsay tag-iya niini nga numero, palihog tug-ani ko ninyo.

(Sumbong ug reklamo? Text sa 0910-8105522)