Ang tinuig nga panginahanglan paglab-as sa business permit sa mga bay patigayon makahatag og higayon sa kagamhanan di lang pagkolekta og buhis kon dili pagsusi sab kon nakatuman ba sa mga lagda nga nagpatigbabaw sa kaluwas sa kinabuhi ug kabtangan sa mga konsumidor. Kon makalusot ang mga patigayon nga way business permit, gawas nga mahikawan ang kagamhanan sa buhis mameligro pa gyod ang katawhan nga di na luwas ang ilang kinabuhi ug kabtangan kay wa nay nakalili sa ilegal nga operasyon.
Makalusot ang mga patigayon nga way business permit tungod sa kamaayong molusot sa mga magpapatigayon o kon nagpabaya o nakigkonsabo gyod ang mga opisyal nga gitahasan pagpatuman sa mga lagda. Mao ni nahitabo sa Dakbayan sa Sugbo ug ubang mga dakbayan ug kalungsoran. Apan lahi ang nahitabo sa Mandaue.
Ang Mandaue City Hall maoy nangunay pagdasig sa mga magpapatigayon sa pagpanglaktod sa mga panginahanglan sa ilang business permit applications. Ang bugtong gikinahanglan mao ang pag-impas sa tanang buhis ug ubang bayranan aron pagkuha o paglab-as sa ilang mga permiso. Gipalabi ni Mayor Teddy Ouano nga makuha dayon ang buhis kay sa pagsusi nakatuman pa ba sa lagda ang mga patigayon sa iyang dakbayan.
Tingali gihatagan lang og unod ni Ouano ang iyang pasalig sa Norkis nga ang Mandaue labing mahigalaon sa mga magpapatigayon. O ganahan lang gyong manglaktod. Apan bisan unsa pay iyang tuyo, pilde ang tanang hingtungdan. Di lang kay gihukasan niyang mga Mandauehanon sa panagang gikan sa wa-nay-seguro-luwas-pa-ba-kay-wa-na-masusi nga mga patigayon; ang nagtinarung nga mga magpapatigayon namuti sang mata og pinaabot sa ilang business permit nga siyam-siyaman una mapagawas sa buhatan sa mayor.
Mao ni nahitabo sa Gene's Laundry nga niulbo niadtong Lunes nga nakapatay og duha ug nakaangol og dul-an sa 20. Gihatagan og business permit bisan wa katuman sa mga panginahanglan, gawas sa pag-impas sa tanang bayranan. Tungod sa laktod nga sistema ni Ouano, nahikawan ang nagkalainlaing buhatan sa kagamhanan paghimo sa ilang gimbuhaton pagtino nga luwas ang operasyon sa labhanan sa Basak, Mandaue. Usa sa nalaktawan mao ang kabomberohan nga makabadlong unta sa sayop nga pagkabutang sa mga tangke sa LPG ug kalikayan untang duguong katalagman.
Bisan ang tag-iya sa Gene's Laundry, nga ig-agaw sa mayor, wa malingaw sa sistema. Human sa tanang panglaktod, naabtan og unom ka buwan una nadawat ang business permit nga iyang gi-aplayan niadtong Marso. Ang bugtong nalipay mao ang mayor nga sayo nga nakakolekta sa buhis.
Si Mandaue City Fire Marshal pormal nang niawhag ni Ouano pag-usab sa sistema. Hinaot nga makaamgo si Ouano sa dako niyang sayop ug hunungon ang iyang panglaktod sa labing daling panahon, sa wa pay laing mangamatay. Inay gukdon si Mayol, nga maoy naandan niyang buhaton batok sa mga tawong di mosipsip niya.
Email:
leo_lastimosa@abs-cbn.com