Gihimo kini sa pipila ka mga operator gumikan sa nagpadayong pagsaka sa presyo sa gasolina. Ang LPG kuno makapamenos og dako sa gasto sa mga drayber ngadto sa ilang mga sakyanan kay mas barato man ang LPG kay sa gasolina.
Apan naay daghang pasahero ang nagdumili sa pagsakay sa taxi nga naggamitan og LPG kay matud nila delikado kini. Kasagaran anha na mangreklamo kon nakasakay na ug nagdagan na ang sakyanan.
Si Konsehal Arsenio Pacaña misugyot nga papitlan og sticker kadtong nag-LPG nga taxi aron mapahibawo ang sumasakay sa wa pa kini makasud sa maong taxi. Niining paagiha malikayan ang panaglalis tali sa pasahero ug drayber.
Sa laing bahin, adunay sugyot nga kadtong mga taxi nga nag-LPG mopamenos sa ilang pletihan. Morag dili kini makiangayon ngadto sa mga drayber kinsa midangop man gani sa LPG aron modako-dako ang inadlaw nilang kita.