Pormal nga gibuksan ang Broadcasters Month sa Kapisanan ng mga Brodkaster ng Pilipinas (KBP) Cebu Chapter pinaagi sa madasigon ug mabulukong parada gikan sa Fuente Osmeña Rotunda paingon sa Kapitolyo nga gisalmotan sa nagkalainlaing mga estasyon sa radyo ug telebisyon sa Sugbo. Sa makausa pa, gipamatud-an sa mga magsisibya ang ilang katakos sa kasamtangang pagpadaplin sa inadlaw'ng indigay ug palabwanay aron pagakos sa mas dakong kamatuoran-nga human maihap ang kataposang kita ug human mahubad ang labing bag-ong ratings, ang mga magsisibya sa Sugbo mahimong maghigalaay ug magtinahuray sa usag-usa.
Si Chairman Edward Abad, kansang liderato maoy nakahatag sa Sugbo sa pasidungog isip labing maayong KBP chapter sa tibuok Pilipinas, labaw sa mas adunahang chapter sa Metro Manila, sa iyang pagpahibawo sa dugang insurance benefits alang sa mga kawani sa sakop nga mga estasyon, maoy nilatid sa tukmang tumong sa KBP: Ang pagpatigbabaw sa kaligdong sa industriya sa pagpanibya ug ang pagpalambo sa kaayuhan sa mga magsisibya.
Atol sa tibuok buwan nga kasaulogan, ang mga haligi sa industriya sa pagpanibya angay'ng mopadayon sa nasugdan ni Abad, ang pagtubag sa mas dagko ug mas malungtarung mga panginahanglan sa kinatibuk-an sa industriya-di lang gani sa pagpanibya kon dili sa media. Samtang panalipdan ang kagawasnon sa matag sakop nga sibyahanan sa paglatid ug pagpatuman sa iyang kaugalingong mga lagda pagduma sa iyang patigayon ug pakigkumpetinsiya sa ubang mga sibyahanan, ang KBP angay'ng motikad ug mohanig sa palibot nga mas haom sa dugang pagdis-og ug paglig-on sa tibuok industriya.
Ang mga sakop karon sa lokal nga board sa KBP dunay gituki nga nagkalainlaing mga lakang nga mopalambo sa indibiduwal nga kita sa mga sibyahanan sa way pagbaraw sa iyahay nilang mga paningkamot. Si Carlo Dugaduga sa Aksiyon Radyo nisugyot nga magpasiugda ang KBP og tinuyong promo nga ipatuman ug kapahimuslan sa tanang sakop nga sibyahanan. Unsaon ni sa pagpatuman nga di malasaw ang gawasnong kumpetinsiya tali sa mga sibyahanan maoy padayon pang gituki sa ubang mga haligi sa industriya.
Sama sa ubang natad sa media, dunay daghan ug dagkong mga hagit nga giatubang karon ang industriya sa pagpanibya: o Ang paspas nga pagkuyanap sa bag-ong mga teknolohiya maoy hagit sa radyo ug telebisyon nga gawas sa ilang naandang pagsibya kinahanglan na sab silang mosalmot sa bag-ong mga paagi sa pakiglambigit sa katawhan; o Ang pagsawom sa pipila ka sibyahanan sa presyo aron lang makakuha og commercials di lang mohulga sa kaligdong sa programming sa maong mga sibyahanan apan makahulga sab sa lahutay sa tibuok industriya; o Ang higpit nga kumpetinsiya, samtang mahimong makadasig sa pag-umol og mas makahuloganong mga tulomanon, dako sang tentasyon sa paglumbaanay pagsibya og makalingaw apan taphaw'ng mga tulomanon nga di makatampo sa mas sanag nga kaugmaon sa nasud ug katawhan.
Email:
leo_lastimosa@abs-cbn.com