Arsobispo Ricardo Cardinal Vidal. Ligdong. May prinsipyo. Mapa-inubsanon. Nakaila ko kang Cardinal Vidal sa telebisyon ug nahibaw-an nako ang iyang posisyon sa simbahan sa akong tunghaan sa high school. Apan wala nako damha nga moabot ang panahon nga akong mahimamat ang lider sa katolikong simbahan sa Sugbo. Wala sab ko magtuo nga moabot ang panahon nga akong ma-interview si Cardinal Vidal. Kinsa ang tingog ug baruganan kanunay'ng gidungog ug girespeto sa katawhan.
Gisaulog karong tuiga ang mga mahinungdanong pahina sa kinabubi ni Cardinal Vidal isip anak ug alagad sa Diyos. Karong tuiga ang ika-singkwenta ka tuig ni Cardinal Vidal isip pari, trayntay singko ka tuig isip obispo ug baynte singko ka tuig isip arsobispo sa Sugbo. Tungod kay talagsaon ra ang maong mga okasyon nga matunong sa usa ka tuig, usa ka espesyal nga grasya ang gihatag sa Santo Papa alang sa mga tawo nga motambong sa misa nga saulogan sa Cardinal sa bisan asang simbahan.
Sa miaging gabii, gipadayag sa mga tawo nga nahikap ni Cardinal Vidal ang ilang pasalamat ug pagyukbo sa lider sa simbahan sa Sugbo. Tuguti ko nga mopaambit sa akong personal nga kasinatian sa kaayo ug kaligdong ni Cardinal Vidal. Mas nakaila nako si Cardinal dihang nipanaw ang Santo Papa, Juan Pablo Dos. Nagsugod ang maong pagkasuod ni Cardinal sa pagkamatay ni Pope John Paul II. Adlaw-adlaw nakong gibisita ang iyang buhatan aron sa pagpangayo og reaksyon gikan kaniya sa mga kalambuan nga nahitabo sa Roma niadtong mga panahona. Niabot ang punto nga akong gi-document ang mga preparasyon ni Cardinal Vidal sa pagtambong sa "conclave", gikan sa iyang puy-anan hangtud na sa airport.
Usa si Cardinal Vidal sa mga lider sa simbahan nga kandidato pagka Santo Papa. Adunay higayon nga nakapangutana siya nganong kanunay nako siyang gisundan. Sa maong punto wako'y laing natubag gawas sa pag-ingon nga usa ka dakong grasya ang pag-cover sa usa ka tawo nga posibleng maoy musunod nga Santo Papa. Walay laing reaksyon ang cardinal gawas sa pagkatawa. Sugod niadto, maka-ingon ko nga mi abante pa ang akong relasyon ni cardinal, di lang isip news source, apan usa ka higala.
Apan bisan kung kaila nami ni Cardinal, adunay mga higayon nga makulbaan pako kung magpainterview ba siya kanako o dili. Apan sa iyang mga pahiyom ug pangutana unsay iyang sayop nganong aduna na say camera nga nagsunodsunod kaniya, nahibawo ko nga bukas ang Cardinal nga motubag sa akong mga pangutana. Sukwahi sa uban nako nga news source, nga inig kahuman sa interview, mahuman usab ang among kulokabildo, lahi si Cardinal Vidal. Siya ang tawo nga mangumosta, mopadayag sa iyang kabalaka sa akong trabaho ug mopasalig nga kanunay ko niyang gilakip sa iyang mga pag-ampo. Pagkanindot paminawon nga may usa ka Cardinal Vidal nga nag-ampo alang sa akong kaluwasan.
Ato-ato lang ni ug palihug ayaw ipanabi sa uban. Sa matag higayon nga magkaabot ang among mga dalan ni Cardinal, kanunay namong mahisgutan ang akong plano sa kaminyoon. Kanunay'ng mangutana si Cardinal Vidal kung kanus-a ko magminyo tungod kay andam siyang mo-officiate sa akong kasal. Apan giklaro sa Cardinal nga wala ko niya gi-pressure nga magminyo. Iyang gitataw nga sa akong edad nga hapit na mag traynta, panahon na aron magtukod ko og pamilya. Tungod sa tanyag sa cardinal naghinam-hinam na hinuon kung magminyo. Apan kung si kinsa akong minyoan, inyo ra nang mahibaw-an sa sunod nakong mga column dinhi sa Banat News.
Sa iyang gitakdang pagretiro sunod tuig, gipadayag sa Cardinal nga wala siya'y butang ug kahimanan nga dad-on. Bisan ang gihatag kaniya nga house and lot nga iyang puy-an sa iya unyang pagretiro, iya pang gipangan sa Archdiocese of Cebu. Kini aron pwedeng magamit sa mga musunod nga moretirong Obispo. Kung ang ubang mga pari adunay gipa-eskwela ug gipapuyo sa kombento, si Cardinal wala. Ang sama ni Cardinal Vidal talagsaon lang nga moabot ning maong henerasyon. Swerte ang Sugbo nga may usa ka tawo nga sama ni Cardinal Vidal nga andam nga mogiya, motambag ug mopangga sa mga tawo nga nagkinahanglan sa iyang presensya.