Ning umaabot nga pagsaulog sa Senior Citizens Month manghinaut kita nga iapil sa agenda sa selebrasyon ang mga problema sa mga tiguwang natong kaigsuonan nga nagkinahanglan og solusyon.
Usa sa maong mga problema mao ang pagdaug-daug ngadto sa atong mga senior citizens sa mga tawo ug establisamento nga gimandoan sa balaud sa paghatag og diskwento sa ilang paliton o serbisyo nga ilang pangayuon.
Daghang mga tiguwang, pananglitan, ang nangreklamo nga daghang botika ang dili mohatag kanila og diskuwento sa tambal nga ilang paliton.
Daghan usab nga mga sakyanang pangpubliko ang dili sad mohatag kanila og fare discount.
Kini supak sa balaod apan nagpadayon ang maong pagsupak tungod kay wa may bisan usa nga sad-an ang nataral sa korte.