Ang estilo mao nga kon ikaw nahibaw-an sa mga suspek nga may sakop sa imong pamilya o kaha paryente nga mi-abroad aron manarbaho, makigsuod siya kanimo ug magpatuo nga kauban siya sa imong anak o kadugo nga nanarbaho sa gawas. Maayo siyang manulti mao nga makadani ug makakombinser gayod sa iyang buladahon nga prospect. Ang iyang tuyo mao ang pagkuha sa imong simpatiya ug pagsalig.
Sa higayon nga mosalig ka na kaniya, mopahungaw na siya sa iyang tuyo. Patuohon ka niya nga nagtugon ang imong anak o paryente nga kauban niyag trabaho sa gawas nga ikaw pahatagon kaniya og kuwarta (dakong kantidad ang ibungat). Ang imo na kunong anak, igsuon o paryente nga atua sa abroad ang maantigong mobayad kanimo sa kantidad nga imong gihatag kaniya (sa suspek). Patuohon ka nga may utang ang imong kabanay kaniya. Ayaw gayod kamog tuo niini aron dili kamo mabiktima niining maong matang sa pangilad.
"Mangayo ko og tambag nimo. Maayo ba nga amo na lang ipapriso ang among anak aron maleksiyon siya?" Pangutana sa atong texter.
Kay ako may gipangayoan nimo og tambag, ako moingon nga anaa ra kana kanimo. Kon imo siyang ipapriso, para nako, dili kana daotan kay kana nagpakita lang nga wala ka mokonsinter sa salawayon niyang binuhatan. Buhata ang gituohan mong makaayo ug makatul-id sa balikong taras sa imong anak.