Rebolusyon sa pagsibya

Kon tigpaminaw ka og radyo o tigtan-aw og telebisyon, usa sa imong labing yanong mga damgo mao nga imong mapaminaw o matan-aw ang tanang pinalabi nimong mga tulomanon. Apan tungod sa trabaho, o klase ug uban pang gimbuhaton, di mahimong magtungkawo ka sa bay ug magsaliping sa imong dunggan sa radyo o mag-atubangan sa telebisyon tibuok adlaw ug gabii.

Tungod ning maong panginahanglan, gawas sa radyo nga dugay nang nataod sa mga sakyanan, may telebisyon nang matan-aw sa mga pasahero ug, panguros mong daan, mga drayber; may gagmay nang radyo nga may headphone nga ikaw ray makabati; ug ang mga estasyon sa radyo ug telebisyon, labi na ang mga nagsibya og 24 oras, mobalik pagsibya sa ilang labing pinaminaw nga mga tulomanon.

* * *

Laing alternatibo mao ang pagpanugon sa imong kapamilya o silingan sa pagsugilon na lang nimo unsay nahisgutan o nahitabo sa imong kinaham nga tulomanon. Kon duna kay kahimanan, mahimong i-record ang tulomanon sa radyo o telebisyon ug unya na paminawon inig-abot na sa bay o kon wa nay laing buhaton.

Apan duna pay haw-ang. Mahimo ba nga ikay magbuot unsang orasa mapaminawan ang imong giatangan nga mga tulomanon? Nganong kinahanglan man kang mamuwaw aron makapaminaw sa Merkado Patrol nilang Juve Villar ug Maria Pino sa alas-2 sa kadlawon? Nganong kinahanglan pa man kang mosayo pagpauli aron makapaminaw sa Rated R ni Marlon Bellita sa alas-4 sa hapon?

* * *

Ato ra ni, hinaot nga di mahibaw-an sa kadaghanan, ug hinaot nga di dayon mauso dinhi sa ato, duna nay bag-ong mga teknolohiya nga mohatag nimo, tigpaminaw sa radyo ug tigtan-aw sa telebisyon sa gahom pagpaminaw sa imong pinangga nga mga programa ug mga personalidad bisan unsang orasa nimong gusto.

Ang podcast usa sa labing init nga teknolohiya karon sa internet. Gawas nga makasubay sa mga tulomanon sa uban, ang podcast mohimo nimong usa ka magsisibya-bisan way prangkisa sa Kongreso, pagtugot sa NTC o lisensiya sa KBP. Human sa higanteng pagtidlom sa kita sa mga pamantalaan tungod sa internet, ang mga estasyon sa radyo ug telebisyon angayng manukad nang daan sa nag-anam pagsulbong nga higanteng karibal.

* * *

Ang nagtanyag sa labing sayon ug libre nga podcast mao ang Podomatic (http://www.podomatic.com). Ang ilang website dunay recorder nga ang bugtong nimong gikinahanglan mao rang pagbutang og mikropono sa imong PC. Human nimog sulti, mahimong i-upload ang recording ug mabatian na sa bisan asang suok sa kalibotan ang imong mensahe.

Apan ang podcast wa pay kuwarta. Di pa andam ang advertisers nga mowaling sa ilang gahin gikan sa mga estasyon sa radyo ug telebisyon ngadto sa internet. Wa hinuon ning kapugong sa higanteng media organizations paghimo nag podcasts. Aron di mabiyaan sa sunod nga rebolusyon sa industriya sa pagpanibya.

* * *

Email: leo_lastimosa@abs-cbn.com