Kung basehan ang insidente sa Garing Elementary School, dili na simpleng pagpanagmal ang nahitabo. Wa lang gisagpa, giingong gisuntok pa sa magtutudlo ang ilong sa iyang tinun-an hinungdan nga nagsunggo ang bata. Way igong kusog ang usa ka bata nga makigharong sa iyang magtutudlo. Gawas nga ana-a ang respeto ug kahadlok sa usa ka bata sa iyang maistra, dili katupngan ang kahadlok o "trauma" nga bation sa usa ka bata.
Basin nagkuwag ang Dep-Ed sa paghatag og giya sa mga magtutudlo labi na ang anaa sa elementarya. Lisud ang paghupot og usa ka klase, nga may kapin traynta ka tinun-an, ug nag-gikan sa lain laing pamilya. Dili tanang bata gipadako sa husto ug malinawong paagi. Daghang mga bata sa publikong tunghaan nga biktima sa kahigayonan, gubot nga pamilya ug kabus nga pagpuyo. Ang magtutudlo maoy mogawas nga magsagubang ning nagkadaiyang batasan sa usa ka bata.
Apan bisan asang punto tan-awon, sayop ang pagdagmal sa usa ka magtutudlo sa bata. Pasangil sa maistra sa Garing, napuno na siya sa tsismis nga gipakatap sa duha ka tinun-an batok kaniya ug alang niya usa kadto ka timailhan sa way pagrespeto sa mga bata. Apan angay tan-awon nga ang respeto dili kinahanglan pangayu-on apan ihatag kini kanimo. Kung way respeto ang bata, basin dili sab gyud ka-respetuhan ang maong magtutudlo.
Gikan sa pagpanlugos, pagpanamastamas ug karon pagpasakit ang mga kasong nasinati sa mga bata sa kamot sa pipila ka magtutudlo. Kung ingon ining klaseng tunghaan ang anaa ta dinhi sa nasud, unsang klaseng mga bata ang gipadako ug giatiman diha sa mga tunghaan? Matud sa kadagkoan sa Dep-Ed, kung madala pa og sabot-sabot kon "amicable settlement" ang usa ka kaso diha sa buhatan sa principal, mas maayo. Husto ba ang maong proseso? Husto ba nga dili na lang silotan ang usa ka magtutudlo? Nga kung mahimo mapapas nalang ang salaod diha palang sa tunghaan?
Kung basehan ang listahan sa mga reklamo sa Dep-Ed Regional Office, daghang mga kaso batok sa magtutudlo nga wala mapadayon tungod sa kadugay sa pagresolbar sa kaso. Ang mabuhat sa mga ginikanan ug sa anak nga biktima, mao ang pagpaabot kung kanus-a mopabor ang hustisya kanila. Adunay uban nga buot nilang ipasaka ang reklamo diretso sa korte inay sa buhatan sa edukasyon tungod sa kahinay sa proseso.
Ang kaso sa Garing ug sa uban pang mga lugar nga may magtutudlong nanagmal, nagpasakit ug nanamastamas sa usa ka estudyante maoy timailhan kung unsa na kakuyaw ang panahon karon. Mismo sa usa ka lugar nga nagtuo ang ginikanan nga luwas ang kahimtang sa iyang anak, kwestyonable pa kung tinu-od ba. Kung mismo diha sa mga tunghaan nahulga ang siguridad sa usa ka bata, unsa pay laing dapit nga pwede niyang kapasilungan nga puno sa pagmahal ug pagpangga?
Sa tunghaan gigahin sa bata ang dakong bahin sa iyang oras sa usa ka adlaw. Nagpasabot lang kung unsa ka dako ug kalapad sa responsibilidad sa usa ka magtutudlo pag-amuma sa usa ka bata. Kung nakabuhat og sayop ang usa ka estudyante, kinahanglan nga ipasabot sa mga ginikanan tungod kay wa nay mas pang nakahibawo unsaon pagdisiplina ang usa ka bata gawas sa iya mismong mga ginikanan.