Dahil sa ang tao’y kanya-kanyang nasa;
Mga lider nati’y walang ginagawa
Kundi magpunahan at saka manira!
Sasabog ang bulkan, may baha, may bagyo
Walang ginagawa mga pulitiko;
Sa halip tumulong sa gawang-sibiko
Ang iginigiit —- sila ay manggulo!
Kitang-kita naman ang mga disaster
Hindi kumikilos ang mga karakter;
Tanging mahalaga sila ay mapansin
Baluktot na hangad papangibabawin!
Halimbawa’y doon sa Bicol at Baguio
Walang tumutulong sa mga binagyo;
Kilalang magaling mga tao rito
Nakapagtatakang laging nasa Metro!
Masasabi pa ring isang halimbawa
Sa Ilocos region na ngayo’y may baha;
Mga pulitikong diyan ay sagana
Dapat ay kumilos -— magbigay-biyaya!
Pero manhid pa rin lider-pulitiko
Mga kalamidad asa lang sa tao;
Ang tanging agenda’y maupo sa trono
Gayong itong bansa’y bagsak na at lumpo!
Sa halip ganito dapat ay tumulong
Mga pulitikong pera’y bumabalong;
Huwag ninyong lansihin bayang papaurong
Sa inyong adhika’t naiibang layon!
Hirap na hirap na itong ating bayan
Sa maraming dusang dulot-kalikasan;
Mga lider natin ay nagsusuwagan
Kaya ang ligaya’y malayong makamtan!
Sa sistemang ito’y anong dapat gawin
Nitong sambayanang sa dusa’y gupiling?
Ah, marapat lamang tayo’y manalangin
Lahing Pilipino’y magbagong damdamin!