Ang "all-out-war" sa gobyerno batok sa mga rebelde maoy sentro nila sa ilang protesta karong adlawa tungod kay matud nila produkto ni's mga bakak sa presidente sa nanlabay niyang SONA. Si Panfilo Arpay pangulo sa Kilusang Magbubukid ng Pilipinas nga usa ka alyadong grupo sa Bayan, miingon sa radio interview niya niadtong Sabado nga pulos bakak ang ilang gipaabot nga unod sa SONA ni Arroyo karong adlawa.
Wa ni'y kalainan sa nanlabay'ng SONA nga matud pa ni Arpay wa gyud makasulbad sa grabing kalisod sa katawhan. Maoy hinungdan matud niya nisamot ang kainit sa pagpakigbisog sa mga kabus ug pagdaghan sa mga rebelde.
Ang kaniadto rang pasalig sa gobyerno nga maayong kahimtang sa panginabuhi wa gyud matagamtami sa mga kabus, gani matud ni Arpay mas ni grabe pa hinuon tungod sa grabing militarisasyon sa kabukiran. Daghang mga mag-uuma ang nawagtangan sa ilang panginabuhi tungod sa ilang gihulagway nga pagpanghasi sa mga sundawo agi'g sangputanan sa gideklarar nga "all-out-war" sa gobyerno batok sa mga rebelde.
Gitug-an ni Arpay nga diha sa 3rd ug 4th district sa lalawigan sa Sugbo daghang mga mag-uuma ang na dislocate gikan sa ilang mga luna nga gitikad tungod kuno sa militarisasyon. Hinungdan nga karong adlawa, sila magprotesta pagsaway sa SONA ni Arroyo.
Usa ka dakong rally ilang ilusad sugod alas 10:00 karong buntag diha sa Capitol ground paingon sa Fuente Osmeña diin adto sila magtagbo ug maniudto sa dili pa sila molahos sa dalan Colon inig ka hapon.
Mamahimong tinuod ang pangangkon ni Arpay nga hangtud karon wa gyud matagamtami sa katawhan ang kaharuhay. Apan di angayan ang atong kalisod karon atong ibasol sa deklarasyon sa all out war sa gobyerno batok sa mga rebelde.
Ang gideklarar nga gubat sa gobyerno alang sa mga rebelde way labot sa kalisod nga atong gitagamtam karon. Naglisod na tang daan sa wa pa modeklarar og all out war ang atong gobyerno batok sa mga rebelde. Kon tinuod nga dunay mga mag-uuma nga nadislocate sa all out war diha sa 3rd ug 4th district angayang ipadangat ni Arpay ang maong suliran ngadto sa mga lokal nga opisyal o dili ba kaha ngadto sa gobernador kay segurado ko nga di silang pasagdan.
Naglibog sab ko nganong nangangkon si Arpay nga dunay mga nadislocate nga mga mag-uuma sa 3rd ug 4th district nga wa pa man koy nadunggan nga engkwentro tali sa mga rebelde ug militar diha sa maong mga dapit karong bag-o human sa deklarasyon.
Kon duna may namalhin nga mga mag-uuma tungod sa kahadlok sa deklarasyon, posibling ang maong mga tawo sekretong nakigkonsabo o ba kaha sakop gyud mismo sa mga rebelde. Ang yanong mag-uuma nga way supak sa balaod nga binuhatan dili angayang mahadlok sa deklarasyon tungod kay wa silay labot niini.
Kon mahitabo nga kamo nabiktima sa pagpangabuso sa militar, duna tay mga hingtungdang ahensiya sa gobyerno nga mopitol sa mga abusadong militar. Ayaw mo og kaikog pagdangop didto sa inyong mga lokal nga opisyal ug isumbong ang pagpangabuso.
Duna say mga sakop sa media nga andam og tagana nga motabang ninyo sa higayon nga kamo mabiktima sa pagpangabuso aron paglutos ug pagsiguro nga mataral sa hukmanan ang mga abusadong sakop sa militar.
Pero nagduda hinuon ko nga pulos bakak ang gipanulti ni Arpay. Kon tinuod nga duna may nadislocate, akong gihagit si Arpay nga ipresentar sila ngadto sa mga sakop sa media kay segurado ko nga sila matabangan sa ilang kahimtang karon.